Осы орайда «Жандану» қоғамдық бірлестігі ерекше қажеттіліктері бар азаматтардың өмір сүру сапасын жақсарту және оларды еңбек нарығына бейімдеу бағытында ауқымды жұмыстар атқаруда. Бірлестіктің жетекшісі – Феруза Абдураевна Юлдашева.
Ұйымның басты мақсаты – мүгедектігі бар жандардың ақпараттық технологиялар мен қашықтан оқыту мүмкіндіктері арқылы кәсіби дағдыларын дамыту, қоғамға бейімдеу және тұрақты жұмыспен қамтылуына ықпал ету. Бұл – инклюзивті қоғам құру жолындағы маңызды стратегиялық қадам.
«Жандану» қоғамдық бірлестігі мүмкіндігі шектеулі азаматтар үшін арнайы бейімделген онлайн оқу платформасын әзірлеп, бірнеше бағыт бойынша курстар ұйымдастырды. Атап айтқанда, қатысушылар компьютерлік сауаттылық, графикалық дизайн, әлеуметтік желілерді басқару (SMM), мәтін теру, онлайн қызмет көрсету сияқты бағыттар бойынша білім алып, заманауи еңбек нарығына қажетті дағдыларды меңгерді.
Оқу курстарын өткізумен қатар, бірлестік жергілікті кәсіпкерлермен, онлайн платформа иелерімен және мемлекеттік мекемелермен әріптестік меморандумдар жасап, курсқа қатысушыларды нақты жұмыс орындарына орналастыруға мүмкіндік берді. Бұл қадам жобаның тиімділігі мен тұрақтылығын арттырды.
Қатысушыларға қажетіне қарай ноутбуктер, гарнитуралар, арнайы техникалық жабдықтар ұсынылды. Сонымен қатар, оқуға қатысушыларға тұрақты техникалық қолдау мен консультациялар көрсетіліп, әр кезеңде жан-жақты көмек берілді.
«Жандану» қоғамдық бірлестігінің бұл бастамасы – мүмкіндігі шектеулі жандардың әлеуметтік оқшаулануын төмендетуге, олардың қоғамға толыққанды мүше болып бейімделуіне, өз кәсібін табуына нақты мүмкіндік беретін үлгілі жоба. Инклюзивті қоғам құру жолындағы осындай игі істер – еліміздің әлеуметтік тұрақтылығы мен адам құқықтарын құрметтеуінің жарқын көрінісі.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
