Қоғамдық бірлестік өзінің жұмысын инклюзивті қоғам құру, балалар мен жастардың шығармашылық, зияткерлік және физикалық дамуына жағдай жасау, сондай-ақ салауатты өмір салтын насихаттау сынды бағыттарда жүзеге асырып келеді. Әсіресе мүмкіндігі шектеулі балалар мен жасөспірімдерді қолдау – ұйымның басты назарындағы әлеуметтік маңызы жоғары бағыттардың бірі.
Ұйым жұмысының ауқымы кең әрі жүйелі. Жамбыл ауданында балалар мен жасөспірімдерге арналған тігін, тоқыма, ағылшын тілі, би үйірмелері мен еріктілер клубы ұйымдастырылып, жүздеген жасқа өз қабілетін дамытуға мүмкіндік берілді. Сонымен қатар жаз айларында ұйымдастырылған аула лагерінде 300-ге жуық бала қамтылып, олар бос уақытын тиімді әрі мазмұнды өткізуге мүмкіндік алды.
Ұйымның әлеуметтік бастамалары республикалық деңгейде де жоғары бағаланып, әлеуметтік жобалар байқауында жеңімпаз атанды. «Игі істер жасау» акциясы аясында мүмкіндігі шектеулі балалар мен жасөспірімдерге көмек көрсетіліп, олардың қажеттіліктеріне бейімделген қол арбалар сыйға тартылды. Бұл шараға 100 ерікті тартылып, азаматтық қоғамның белсенділігін көрсететін нақты үлгі қалыптасты.
Салауатты өмір салтын насихаттау бағытында да ұйым бірнеше маңызды шараларды жүзеге асырды. Мемлекеттік әлеуметтік тапсырыс аясында ауыл жастарына арнап 4 спорттық эстафета мен 6 флешмоб ұйымдастырылып, 150-ден астам жас қамтылды. Бұл – денсаулықты нығайту ғана емес, жастар арасында бірлік пен командалық рухты қалыптастыруға арналған нәтижелі жұмыстардың бірі болды.
Тараз қаласындағы «Көне Тараз» тарихи-мәдени кешенінде өткізілген ұлттық рухтағы «Қазақ ауылы» іс-шарасы да ұйым жұмысының жарқын көрінісі. Бұл күні қатысушылар ұлттық спорт ойындарымен танысып, концерттік бағдарламаны тамашалады, қолөнер көрмесі мен білім беру ұйымдары өкілдерімен кездесулер өтті. Аталған іс-шараға 45 ерікті, 60 мүмкіндігі шектеулі азамат, 15 ата-ана мен 20 әлеуметтік қызметкер қатысып, барша жұртшылықты бір ортаға тоғыстырған шынайы инклюзивті орта қалыптасты.
«Айналайын» қоғамдық бірлестігінің қызметі – әрбір бала мен жасөспірімнің әлеуетін ашуға, қоғамда өз орнын табуына және айналасындағы адамдармен тең дәрежеде өмір сүруіне мүмкіндік беретін маңызды әлеуметтік-мәдени миссия. Ұйым алдағы уақытта да өз бағытынан таймай, жаңа жобалар арқылы игілік пен жанашырлықты насихаттай бермек.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
