ЖШС ашу үшін ісін жаңа бастаған қазақстандықтарға жарғы ұсынудың, тіркеу жарнасын төлеу немесе салық басқармасына барудың қажеті жоқ. Қазір заңды тұлғаларды тіркеу мемлекеттік қызметі толық автоматтандырылған. Тек компьютер мен ЭЦҚ болса болғаны.
Егер egov.kz порталында келесі нұсқауларды орындасаңыз, жарты сағатта кәсібіңізді тіркей аласыз:
— «Кәсіпкерлікті тіркеу және тарату» бөлімінде қажетті тіркеу түрін таңдау керек;
— құрылтайшы кәсіпкерлік қызметін бастағаны туралы тіркеуші органға хабарлама береді;
— тиісті жолдарды толтырғаннан кейін жүйе барлық деректердің дұрыстығын тексеруді сұрайды.
Бәрі дұрыс болса, жүйе ақпаратты өңдеп, 30 минут ішінде ЖШС тіркелгені туралы анықтама береді. Шағын және орта бизнес үшін бұл қызмет тегін.
ХҚО-лар қолхат беруді тоқтатады
«Азаматтарға арналған үкімет» мемлекеттік қызметтердің басым бөлігін қағазсыз қызметке ауыстырмақ. Қазірдің өзінде ХҚО-ларда 8 қызмет бойынша қағаз түрінде берілетін қолхатты қысқартты. Жақын арада барлық мемлекеттік қызмет қолхатсыз көрсетілетін болады.
Енді клиенттер құжаты дайын болғанда қай ХҚО-ға жүгіну керектігі және уақыты көрсетілген sms-хабарлама келеді. ХҚО операторына қолхаттың осы электронды нұсқасын көрсетсе жеткілікті.
Қолхат берілмейтін қызметтер тізімі:
1. Қазақстан Республикасының Ұлттық куәландырушы орталығының тіркеу куәлігін беру және кері қайтарып алу;
2. Қазақстан Республикасы халқын тұрғылықты жері бойынша тіркеу;
3. Қазақстан Республикасы халқын тұрғылықты жері бойынша тіркеуден шығару;
4. Азаматтық хал актілерін тіркеу туралы қайталама куәліктер немесе анықтамалар беру;
5. Соттылықтың болуы немесе болмауы туралы анықтама беру;
6. Жылжымайтын мүлікке құқық белгілейтін құжаттың телнұсқасын беру;
7. Жылжымайтын мүлік объектілерінің жоспарын (схемасын) қоса алғанда, тіркеу органы куәландырған тіркеу ісі құжаттарының көшірмелерін беру;
8. Жылжымайтын мүлік объектілерінің техникалық паспортының телнұсқасын беру.
Мобильді азаматтар базасында (МАБ) тіркелген нөміріңізді ХҚО-ға бармай-ақ, өзіңіз ауыстыра аласыз.
Оның екі жолы бар:
1. Еgov.kz порталындағы жеке кабинетіңізге кіріңіз. Мәліметтеріңіз жазылған бұрыштағы телефон нөміріңізді «редакциялау» арқылы өзгертіңіз. Жаңа нөміріңізге түскен кодты енгізіңіз және ЭЦҚ көмегімен қол қойыңыз.
Сіздің нөміріңіз жеке кабинетте және МАБ-да автоматты түрде өзгереді.
2. Порталдың басты бетінде орналасқан виртуалды ассистентке видеоқоңырау шалыңыз. Байланысқа шыққан операторға өзіңіздің ЖСН-іңіз бен SMS-хабарлама алғыңыз келетін жаңа нөміріңізді айтыңыз.
Жаңа нөміріңіздің тіркелгені туралы сізге хабарлама жолданады.
