Бүгін Байзақ ауданы тұрғындарының алдында аудан әкімі Рахматілдә Рахманбердиев есеп берді. Есепке облыс әкімі Асқар Мырзахметов, облыс әкімі аппаратының басшысы Нұржан Календеров, облыс пен аудан мәслихат депутаттары, аудан әкімдігінің бөлім басшылары және тұрғындар қатысты. Аудан әкіміне «Рола — 7» компаниясының директоры, облыстық маслихат депутаты Тұрсынбек Нұрбаев аудан және облыс әкіміне былай деп сауал жолдады:
— Мен басқаратын компанияда қазіргі кезде 150 адам жұмыс істейді. Одан өзге 2017 жылы жаңадан «Рола-Ян» компаниясын ашып 285 миллионға инвестор алып келгенмін. Енді бір мәселе, біздің компанияға дейін трасса 700 метр жол бар. Ол жол асфальт емес. Компанияға шетелден көп адамдар келеді. Жамбыл облысына келген меймандардың барлығы бірінші бізге келеді. Екіншіден бізге, Оңтүстік Кореядан екі-үш рет меймандар келді. Олар біздің жолдың жағдайын көріп, компанияға ақша бөлуге бола ма, жоқ па деп ойланады. Одан кейін 2017 жылы Америкадан бізбен бірлесіп жұмыс істеу ниетінде адамдар келді. Олар ең бірінші кезекте бізден «осы жолды жөндейтін адам бар ма?» деп сұрады. Баршаңыз білесіздер, Елбасы жолдауында үкімет ең алдымен кәсіпкерлерді қолдауы тиіс деп жиі айтады. Біз бүгінгі күні өнімдерімізді шет елдерге жіберіп жатырмыз. Қазіргі таңда «Рола-Ян» компаниясы Ресеймен жұмыс жасайды. Биыл 2018 жылға Россия, Молдавия, Түрменстан және Қытаймен келісімшартқа отырдық. Бірақ жаңағы жолдан күн сайын жүк машиналары жүре береді. Сол жол күннен күнге құрып бара жатыр. Сол жолды көріп, соған баға берсеңіз. Бұл бір. Екіншіден біздің компанияның жанында 2 гектар жер бар. Ол бұрынғы кірпіш зауытының орны. 2012 жылы осы компанияны сатып алғанда сол жерді алып, қосымша цех қосу деген ой болды. Осы уақытқа дейін сол жердің шаруасы шешілмей жатыр. Мен осы Байзақ ауданына келгелі бері бар білімімді осы ауданның гүлденуіне жұмсадым. Бүгінгі таңда бізде мүмкіндіктер бар. Жаңадан инвесторлар тартып, жаңа цех салуға болады. Егер уақытыңыз болып жатса, біздің компанияға келіп, сол жерді көрсеңіз деймін.
— Сіздің жол бойынша көтерген мәселеңізге тоқтала кетсек. Жол Қызыл Жұлдыз ауылының шетінен өтетін өндірістік жол болып саналады. Ол жолда үй жоқ. Сол себепті ол жолды көше деп елді мекеннің ішіндегі жолға жатқызу мүмкін болмай отыр. Бұл туралы сізге түсіндіріп айтқанмын. Сондықтан оның шешу жолын кәсіпкерлер мен демеушілер арқылы шешсе болады. Өзіңіз сияқты кәсіпкерлермен бірігіп қарастырайық деп ұсыныс бергенмін. Бизнестің жол картасында инфроқұрылымда жол салу деген мақсат алынып тасталынған. Сондықтан біз сізге не кәсіпорыныңыз бойынша жол салып бере алмай отырмыз. Ауылдың шетінде болғаннан кейін не көшеге енгізе алмай отырмыз. Оның үстіне, өздеріңіз білесіздер, Қызыл жұлдыз ауылының көп жерін біз Жамбыл ауданынан тамыз айында ғана өзімізге аударып алдық. Сол себепті біз ауылға, Талас станциясына бас жоспар дайындап жатырмыз. Бас жоспарға жолды кіргізудің заңды тетіктерін қарастырып жатырмыз. Екінші мәскеле, жер бос жатыр дейсіз. Бос жатқан жоқ, ол жердің иесі бар. Кезінде біреу сатып алған. Сіздер сатып алу туралы келіссөздер жүргізе алмай отырсыздар. Енді біз елдімекен ішінде жер бере алмай жатырмыз. Ол жер шынымен пайдаланылмай тұрған жер. Қазір елді мекендердің жерлерін түгендеп, шаруа қожалықтарға өткіземіз деген жоспарымыз бар, — деді Байзақ ауданының әкімі Рахматілдә Сегізбайұлы.
Есепті жиындағы осы диалогтан санамызда «үлкен кәсіпорны бар депутат 700 метр жол сала алмай отыр ма?» деген сауал туды. Бұл қалай? Әлде мемлекетке ауыз ашып, өңірге әлеуметтік көмек жасағысы келмей ме? Депутат деген шені бар мәслихат өкілі болып неге сайланды? Бизнесмендеріміздің «Шық бермес Шығайбай» болған заманы болды. Ақиқаты осы. Мен мемлекетке не берем емес, не алсам деген бизнесмендер көбейген уақытта өмір сүріп жатырмыз. Ел қамын күйттеген депутаттарымыз ауылдың ертеңіне елеңдеуден қалған секілді. Қалай болғанда да қара халықтың қамын жеп һәм сол елдің топырағында өз бизнесін дөңгелетіп отырған депутат ағамыздың мұнысы үлкен әбестік деп есептейміз.
TURANINFO.KZ
