Жамбыл облыстық мәслихат депутаттары Мойынқұм ауданындағы экономикалық даму мен салық түсімдерін талқылады
Жамбыл облыстық мәслихат депутаттары мен инспекторлары Мойынқұм ауданындағы экономикалық даму мен салық түсімдері мәселелерін талқылау мақсатында аудан әкімі Е.Карентаевпен және аудандық мемлекеттік кірістер басқармасының ұжымымен кездесті. Жиналыс барысында ауданның экономикалық көрсеткіштері мен салық түсімдеріне байланысты мәселелер қаралды. Мемлекеттік кірістер басқармасының басшысы Б. Байтик ауданның қаржылық жағдайы мен салық түсімдері туралы баяндама жасады.
Депутаттық жұмыс тобына облыстық мәслихат депутаттары Л.Толебаев, А.Жұзанов, О.Даутов, Б.Қалымбетов, Н.Адилов, А.Жолмаханова, Ж.Бастаубаева, сондай-ақ облыстық мәслихат аппаратының бас инспекторлары Р.Айдынбеков, Ж.Сатыбалдиева, облыс әкімінің экономика және бюджеттік жоспарлау басқармасынан Ғ.Сагиндыков, Жамбыл облысы бойынша Мемлекеттік кірістер департаментінен А.Толегенов, тексеру комиссиясынан П.Абдыкаримова қатысты.
Депутаттар Мойынқұм ауданындағы ірі кәсіпорындардың жұмыстарымен танысты. Бірінші кезекте «Магнит+» кешеніне барып, жобаны 2017 жылдан бастап жүзеге асырып келе жатқан Б.Уткелбаевтың баяндамасын тыңдады. Ол жобаға 250 миллион теңге жеке қаржысын салғанын айтты. Кешенде дүкен орталығы, тамақтану орны, бильярд үстелдері мен караоке кабинкалары бар. Қазіргі уақытта орталық 12 адамды тұрақты жұмыспен қамтып отыр. Сонымен қатар, аудандағы ірі сауда орындары мен қонақ үйлерде де зерделеу жұмыстары жүргізілді.
Келесі кезекте депутаттар Ақбақай ауылында орналасқан «Алтыналмас» АҚ-ның «Ақбақай» филиалында алтын-күміс кенін өндіру және өңдеумен айналысатын ірі компанияны зерттеді. 2024 жылы компания 1964 келі алтын, 353 келі күміс өндірген. Қазіргі уақытта кәсіпорында 1049 адам жұмыс істейді, оның ішінде 390 адам Мойынқұм ауданының тұрғындары. 2024 жылы өндірілген өнім көлемі 70 449 миллиард теңге құрады. Компанияның бүгінгі жағдайымен «Алтыналмас» АҚ-ның Ақбақай филиалының басшысы А.Сейтжанов таныстырды.
Жиналыс барысында ауданның экономикалық дамуы мен салық түсімдерін арттыру бойынша бірқатар ұсыныстар қаралды. Депутаттар аудандағы кәсіпорындардың жұмысын одан әрі жетілдіруге және жергілікті тұрғындардың өмір сапасын көтеруге бағытталған шараларды қолдады.
Мойынқұм ауданында жүргізілген зерделеу жұмыстары облыстың экономикалық дамуына үлкен ықпал ететіні айтылып, бұл бағыттағы жұмыстардың жалғасуы күтілуде.
