2022 жылдан бастап Қазақстанда цифрлы қызметтерге салық, яғни Google салығы енгізілді. Бұл елде жұмыс істейтін трансұлттық ІТ-компанияларға әділ салық салу мақсатында жасалған қадам болды.
«2025 жылғы мамырдан бастап OpenAI, L.L.C. компаниясы шартты түрде тіркелді. Бұл — жасанды интеллект саласындағы жетекші америкалық ұйым, кеңінен танымал ChatGPT интеллектуалды жүйесінің әзірлеушісі. Енді Қазақстан аумағындағы жеке тұлғаларға қызмет көрсеткені үшін ChatGPT Қазақстан Республикасының салық заңнамасына сәйкес қосылған құн салығын төлейді», — деп жазылған хабарламада.
Айта кетейік, ChatGPT — жасанды интеллектіге негізделген чат-бот. GPT (Generative Pre-trained Transformer) тілдік моделі негізінде жұмыс істейді және мынадай мүмкіндіктерге ие: сұрақтар мен өтініштерді түсіну; мағыналы әрі қисынды жауаптар құрастыру; аударма, хат жазу, кодтау, оқу және басқа да салаларда көмек көрсету.
ChatGPT-ді виртуалды көмекші, кеңесші, сұхбаттасушы немесе шығармашылық пен жұмысқа арналған құрал ретінде пайдалануға болады.
