ТЖ департаментінің бастығы полковник Арман Токанов қызметтік борышын орындау кезінде қаза тапқан Жамбыл облысы ТЖД Өрт сөндіру және авариялық-құтқару жұмыстары қызметі бастығының орынбасары болған марқұм азаматтық қорғау полковнигі Мейіржан Аймановтың отбасына барды. Қазақстан Республикасы Президентінің Жарлығымен Айманов Мейіржан Көпбосынұлына «Халық қаһарманы» атағы беріліп, Алтын жұлдыз» және «Отан» ордендері табысталған болатын.
Жамбыл облысының бас құтқарушысымен бірге батырдың отбасына, яғни оның рухына құрмет көрсету мақсатында әріптестері де бірге келді. Олар анасына, жұбайына және балаларына ұлт үшін жанын қиған азамат өміргені үшін шексіз алғыстарын білдіріп, ҚР ТЖМ Мәлік Ғабдуллин атындағы азаматтық қорғау академиясының бастығы атынан алғыс хатты табыс етті. 2021 жылғы 26 тамызда Жамбыл облысындағы оқ-дәрі қоймасында өртті сөндіру барысында қаза тапқан Халық қаһарманы Мейіржан Аймановтың есімі «өрт қауіпсіздігі 2135» оқу тобына берілді. Нақты әрі сауатты іс-қимыл мен жанқиярлық ерлігінің арқасында 3 елді мекеннің тұрғындары құтқарылды.
Адам үшін ең қымбат нәрсе ол адам өмірі. Халықты түрлі сипаттағы төтенше жағдайлардан қорғай отырып, қызыл жалынмен күрес барысында еш ойланбастан анттарына адал болып, жанын қиған азаматтардың ерлік істері мәңгілік жүректерде сақталады.
Жамбыл облысы ТЖД баспасөз қызметі
