Баланың дүниеге келуі – әр отбасы үшін қуанышты әрі жауапты сәт. Осы кезеңде ата-аналар үшін маңызды міндеттердің бірі – жаңа туған нәрестенің туу туралы куәлігін уақытылы рәсімдеу.
«Азаматтарға арналған үкімет» мемлекеттік корпорациясының Жамбыл облысы бойынша филиалының мәліметінше, бүгінде туу туралы куәлікті алу бұрынғыдан әлдеқайда жеңілдеген. Қызметті онлайн форматта да, халыққа қызмет көрсету орталықтары арқылы да рәсімдеуге болады.
Қолданыстағы заңнамаға сәйкес, баланың тууы үш жұмыс күні ішінде тіркелуі тиіс. Ата-аналар өтінішті өздерінің таңдауы бойынша кез келген азаматтық хал актілерін тіркеу органына бере алады.
Тууды мемлекеттік тіркеу үшін медициналық туу туралы анықтама немесе туған фактісін анықтау туралы сот шешімінің көшірмесі негіз болады. Медициналық анықтамада ана туралы мәліметтер, баланың тегі, аты, туған күні мен жынысы көрсетіледі. Егер анықтама қағаз түрінде берілсе, ол медициналық ұйымның қолы және мөрімен расталуы тиіс. Ал электрондық форматтағы құжат жауапты қызметкердің электрондық цифрлық қолтаңбасымен куәландырылады.
«Жыл басынан бері Жамбыл облысында 7 671 туу туралы куәлік берілді. Оның ішінде ең көп тіркеу Тараз қаласында жүргізілді – 3 332 куәлік рәсімделді. Қордай ауданында – 1 124, ал Байзақ ауданында 553 нәрестенің тууы тіркелді», – дейді «Азаматтарға арналған үкімет» мемлекеттік корпорациясы Жамбыл облысы бойынша филиалының директоры Батырхан Тоқтағұл.
Мемлекеттік корпорацияның мәліметінше, 2026 жылдың алғашқы бес айында туу фактісін тіркеуге берілген өтініштердің 80 пайыздан астамы онлайн түрде рәсімделген. Бұл тұрғындардың цифрлық мемлекеттік қызметтерді пайдалануға деген қызығушылығының артып отырғанын көрсетеді.
Айта кетейік, туу туралы куәлікті рәсімдеу үшін өтінішті бірнеше тәсілмен беруге болады:
– SMS-хабарлама арқылы проактивті қызмет ретінде;
– электрондық үкімет порталы арқылы;
– мобильді қосымшалар көмегімен;
– халыққа қызмет көрсету орталықтарына жүгіну арқылы.
Мамандар ата-аналарға баланың алғашқы құжатын уақытылы рәсімдеуді және мемлекеттік қызметтердің онлайн мүмкіндіктерін тиімді пайдалануды ұсынады.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырыс негізінде жарияланды.
