Мектепте соңғы қоңырау соғылды, енді көптеген оқушылардың легі демалуға аттанады, олардың демалысы көңілді, пайдалы және ең бастысы қауіпсіз өтуі тиіс. Соңғы жағдайды қамтамасыз ету, сондай-ақ жазғы демалыс, суға шомылу маусымы және жазғы кезеңде балалардың демалысы мен сауықтыруды ұйымдастыру құқықтық тәртіп сақшыларының тұрақты назарында.
Полицейлер үшін оңтүстіктің жазғы маусымы ыстық, қапырықты болады деп күтілуде. Жамбыл облысының Полиция департаменті Жергілікті полиция қызметі басқармасының бастығы полиция полковнигі Мұрат Байсеркенов біздің балаларымыздың көңіл-күйлері мен әртүрлі тосын жағдай салдарынсыз демалуы үшін полиция қызметкерлерінің тарапынан атқаратын жұмыстар туралы айтып берді.
— Мұрат Кәрімұлы, Жергілікті полиция қызметі өз жұмысында қандай алдын алу шараларына баса назар аударды?
— Біріншіден, кәмелетке толмағандар арасындағы құқық бұзушылықтар мен қылмыстардың алдын алу, сондай-ақ суға шомылу маусымында жазатайым оқиғалардың алдын алу мақсатында облыстың барлық мектептерінде ювеналдық полиция қызметкерлері жазғы демалыс кезеңінде ересектердің балаларға бақылау жасауды жүзеге асыруы тақырыбында 500-ден астам ата-аналар жиналысын өткізді.
Сондай-ақ, облыс аумағындағы барлық оқу орындарында құқық бұзушылықтың алдын алу, балалардың қадағалаусыз және қараусыз қалуының профилактикалық мәселелері бойынша мектеп пен қала сыртындағы жазғы лагерьлердің директорларымен кеңес өткізіледі.
Екіншіден, ювеналдық полиция басшылығымен жастар көп жиналатын жерлерде (саябақтар, скверлер, алаңдар) күшейтілген бақылауды жүзеге асыру үшін барлық білім беру мекемелеріне мектеп инспекторлары бекітілді.
Үшіншіден, кәмелетке толмағандардың қатысуымен құқыққа қарсы әрекеттердің алдын алу және жолын кесу үшін Тараз қаласының аумағында патрульдеуді жүзеге асыратын қосымша үш мобильдік топ бөлінген.
— ҰБТ мен емтихан тапсыру кезінде қосымша қауіпсіздік шаралары қарастырылған ба?
— Әрине. Мемлекеттік емтихандарды тапсыру кезінде 27 мамырдан 7 маусымға дейін мектептерде және ҰБТ тапсыру кезінде жоғары оқу орындарына түсушілерге ағымдағы жылдың 20 маусымынан 5 шілдесіне дейін осындай бекітулер жоспарланған.
— Мұрат Кәрімұлы, мектеп жанындағы және қала сыртындағы лагерьлерде демалуды ұйымдастыру мәселесі қалай?
— Балалар мен жасөспірімдердің демалысын, сауықтырылуын ұйымдастыру, сондай-ақ кәмелетке толмағандардың арасындағы құқық бұзушылықтардың, қылмыстылық жағдайы және қадағалаусыз қалуының алдын алу үшін 10 маусымнан бастап облыс көлемінде 425 жазғы мектеп жанындағы және 10 қала сыртындағы сауықтыру лагері жұмыс істей бастайды.
Жазғы кезеңде балалардың демалысын ұйымдастыру мақсатында жетім балалардың, ата-анасының қамқорлығынсыз қалған, сондай-ақ полиция органдарында есепте тұрған балалардың, толық емес және қолайсыз отбасыларында тәрбиеленетін балалардың тізімі бекітілді. Ювеналды полиция инспекторларын бекіту салауатты өмір салтын насихаттауға және «мүлдем төзбеушілік» қағидатын сақтауға бағытталған алдын алу іс-шараларын өткізу кестесіне сәйкес жүзеге асырылады, — деп түйіндеді өз сөзін Мұрат Кәрімұлы.
