Шымкент гарнизоны әскери сотының судьясы Бүрлібай Каиповтың төрағалық етуімен Жамбыл облысы Байзақ ауданы Қайнар ауылында орналасқан 28349 əскери бөлімінде қару-жарақ қоймасының жану жəне жарылу фактісі бойынша қылмыстық істі қарау басталды.
Аслан Бақытжанов және Руслан Несіпқалиев ҚК-нің 462-бабының 3-бөлігі (оқ-дəрiлермен жəне жарылғыш немесе айналасындағыларға аса қауіп төндіретін өзге де заттармен жұмыс істеу қағидаларын бұзу, абайсызда екі немесе одан да көп адам өліміне əкеп соққан іс-əрекет), 453- бабының 2-бөлігімен (бастықтың немесе лауазымды адамның қызметке елеулі зиян келтiре салғырт қарауы, ауыр зардаптарға əкеп соққан іс-əрекет) бойынша Ерлан Бошай және Берік Омарбеков ҚК-нің 453-бабы 2-бөлігімен (бастықтың немесе лауазымды адамның қызметке елеулі зиян келтiрген салғырт қарауы, ауыр зардаптарға əкеп соққан іс-əрекет), Ерболат Тұранов және Әсет Әшірбай ҚК-нің 202-бабы 3-бөлігінің 1,2- тармақтары (абайсызда адам өліміне жəне аса ірі залал келтіруге əкеп соққан бөтеннің мүлкін қасақана жою немесе бүлдіру), 459-бабының 2-бөлігімен (ауыр зардаптарға əкеп соққан, алдын ала сөз байласу арқылы адамдар тобы жасаған қару-қарақты, оқ-дəрілерді, қозғалыс құралдарын, əскери техниканы немесе өзге де əскери мүлікті қасақана жою немесе бүлдіру) бойынша сотқа берілген.
Еске салсақ, 2021 жылдың 26 тамызда Жамбыл облысы Байзақ ауданы Қайнар елдімекені маңындағы әскери бөлімнің қару-жарақ сақтайтын қоймасынан өрт шықты. Өртті ауыздықтауға әскерилер мен төтенше жағдайлар басқармасының офицерлері мен сержанттар құрамы бірлесе тілсіз жауға қарсы тұрып, тосыннан болған қатты жарылыстардан 18 адам қайтыс болды.
