«Қазақстанның үздік әлеуметтік жобалары» республикалық байқауының облыстық кезеңінің салтанатты марапаттау рәсімінің ақпараты
«Нұр Отан» партиясы және ҚР Еңбек және халықты әлеуметтік қорғау министрлігі ұйытқы болған бастамашыл жоба аясында байқаудың өңірлік кезеңінің жеңімпаздары анықталды. Бес бағыт бойынша өткізілген аймақтық байқаудың іріктеу кезеңі сәуір айында бастау алған болатын. Салтанатты шарада облыс әкімінің бірінші орынбасары Бекболат Орынбеков жобаның мүмкіндігі шектеулі жандарға күнделікті тіршілікте және шығармашылық қабілеттерін дамытуда тең жағдай жасайтындығын алға тартты. – «Нұр Отан» партиясы өңірде азаматтық қоғам белсенділігін барынша арттыра отырып, осындай әлеуметтік мәселелердің оң шешім табуына ықпал етуге басымдықтар беріп отыр. Сонымен қатар, ұсынылған әлеуметтік жобаларда қолданылған үздік өңірлік тәжірибелерді кеңінен таратуға және оны іске асыруға бағытталған. Алайда, облыста мүмкіндігі шектеулі жандарға әлеуметтік қызмет көрсету және әлеуметтік проблемаларды шешу бағытындағы үкіметтік емес ұйымдардың өте аздығы осы жоба барысында байқалып қалды. Осыған орай, «Нұр Отан» партиясының облыстық филиалы өз филиалдарына алдағы уақытта бұл мәселені айрықша бақылауға алып, әлеуметтік бағытта жұмыс жасайтын үкіметтік емес ұйымдар қатарын арттыруға байланысты тиісті тапсырма беріп отыр. Сонымен қатар, аталған әлеуметтік жобалар өңірде мүмкіндігі шектеулі жандардың алдынан кездесіп жүрген өзекті әлеуметтік мәселелерді шешуге үлкен септігін тигізетін болады деген сенімдемін, – дейді партия облыстық филиалы төрағасының бірінші орынбасары Мұратхан Шукеев. Айта кетейік, аймақтық аламанға іріктеу кезеңдерінен сұрыпталып 16 жоба ұсынылған болатын. Арнайы құрылған комиссияның шешіміне сәйкес «Тараз қалалық мүгедектер қоғамы» қоғамдық бірлестігінің «Жүректен жүрекке» жобасы үздік атанды. Ал екінші орынға «Айналайын» балалар мен жасөспірімдер орталығы» жастар клубы» ҚБ ЮНЕСКО-клубының «Этно Арт Фест» жобасы лайық деп табылса, үшінші орынға облыстық «Онкологтар ассоцияциясы» ҚБ «Уақытылы диагностика – денсаулық кепілі» жобасы ие болды. Сондай-ақ байқауға белсенді қатысқаны үшін өзге де жоба авторлары арнайы дипломмен марапатталды. – Жобаға екінші рет қатысып отырмыз. Өткен жылы «Шуақ» деп аталған жобамызды ұсынған болатынбыз. Мұнда қазақтың ұлттық құндылықтарын дәріптеу арқылы жазғы лагерьлерде бірлестіктің еріктілерімен киіз үйді құруды ұйымдастырдық. «Этно Арт Фест» атты биылғы жобамызда да жас ұрпақтың бойына қазақылықтың қаймағы сақталған рухани жәдігерлерімізді, оның ішінде қыз жасауын әзірлеу, ләңгі тебу секілді құндылықтарды ұғындыруға бағыттады. 2004 жылы ашылған бірлестіктің бастапқы мақсаты да осындай болатын. Бүгінде бірлестікте 15 мүмкіндігі шектеулі жандар жұмыс жасайды. Оймақ ойып, ине ұстауға қабілеті бар жандарды біз жұмысқа икемдеп, тәжірибемізден өткізіп, жұмыспен қамтимыз. Осындай істің нәтжесінде қазір әлеуметтік дүкеннің жұмысын дөңгелетудеміз. Және 2010 жылы бірлестік «Клуб ЮНЕСКО» мәртебесін иеленді, – дейді «Айналайын» ҚБ төрайымы Айгүл Разақова.
