Бұған дейін Telegram-арналарда белгісіз біреудің 15 миллион қазақстандықтың жеке деректерін 0,5 биткоинге сатылымға қойғаны туралы ақпарат тараған еді. Онда eGov жүйесі бұзылып, тұрғындардың құжат мәліметтері, телефон нөмірлері, пошталары, жұмыс орындары мен құжат скандары қолды болғаны айтылды.
Жауапты ведомство бұл жағдайға қатысты арнайы тексеріс басталғанын хабарлады. Қазіргі уақытта мамандар ұсынылған деректер үлгілерін талдап, олардың қайдан шыққанын анықтау үстінде. Әзірге электронды үкімет жүйесінің бұзылғаны немесе базаның тікелей eGov қызметінен ұрланғаны расталған жоқ.
Министрлік өкілдері жарияланған мәліметтердің бір бөлігі электронды үкіметтің деректер құрылымына сай келмейтінін атап өтті. Атап айтқанда, eGov жүйесінде төлқұжаттардың скан-көшірмелері мұндай форматта сақталмайды, ал цифрлық құжаттардың құрылымы мүлдем басқаша. Сонымен қатар, алаяқтардың мәлімдемесі жүйенің бұзылғанына дәлел бола алмайтыны айтылды.
Тексеру жұмыстары аяқталған соң қосымша ақпарат беріледі. Ведомство азаматтарға цифрлық қауіпсіздік шараларын қатаң сақтауды, құпия кодтар мен ЭЦП кілттерін ешкімге бермеуді, белгісіз сілтемелерге өтпеуді және әртүрлі қызметтер үшін күрделі құпия сөздерді пайдалануды ұсынады.
