Сондықтан әйелдер үшін қолайлы еңбек жағдайын жасау — мемлекет пен қоғам алдындағы ең өзекті әлеуметтік міндеттердің бірі болып отыр.
Осы мақсатта «AMANAT» партиясының Әйелдер қанаты арнайы бастама көтеріп, орта және ірі кәсіпорындардағы еңбек жағдайын зерделеу жұмыстарын бастап кетті. Зерттеу барысында өндіріс орындарында жұмыс істейтін әйелдердің жағдайына, еңбек қауіпсіздігіне, әлеуметтік қолдауға және кәсіби дамуына баса назар аударылуда. Бұл жұмыс тек жағдайды бағамдаумен шектелмей, нақты ұсыныстар әзірлеуге бағытталған. Алдағы уақытта «Әйелдерге қолайлы кәсіпорын» атты арнайы стандарт енгізіліп, өндіріс орындарында еңбек етіп жүрген әйелдердің құқығын қорғауға және әлеуметтік тұрғыдан қолайлы орта қалыптастыруға мүмкіндік бермек.
Жамбыл облысында бұл бастама аясында 24 кәсіпорынға кешенді зерделеу жұмыстары жүргізілді. Өңірлік Әйелдер қанатының жетекшісі Айман Әшімова жұмысшы әйелдермен кездесулер өткізіп, олардың ұсыныс-пікірлерін тікелей тыңдады. Әсіресе Тараз қаласындағы «Казфосфат» ЖШС Минералды тыңайтқыштар зауыты, «ТаразЭнергоОрталығы» АҚ және «Жамбыл жылу» кәсіпорындарындағы кездесулерде бірқатар өзекті мәселелер көтерілді.
Зерттеу нәтижесі көрсеткендей, әйелдер үшін белгілі бір қолайлы жағдайлар қарастырылғанымен, шешімін күткен түйткілдер де жоқ емес. Жұмысшылар тарапынан икемді жұмыс кестесін енгізу, тұрақты медициналық тексерулерді күшейту, әйелдердің еңбек құқықтарын қорғауға бағытталған шараларды кеңейту секілді ұсыныстар айтылды. Сонымен қатар, ауыр өндіріс саласында еңбек етіп жүрген әйелдер үшін зейнет жасын төмендету мәселесі де жиі көтерілді. Бұл – олардың денсаулығын сақтау мен әлеуметтік әділеттілікті қамтамасыз етудің маңызды қадамы ретінде бағалануда.
«AMANAT» партиясы Әйелдер қанатының өкілдері бұл ұсыныстарды назарға алып, алдағы уақыттағы арнайы стандарт жобасына енгізуді жоспарлап отыр. Осылайша, әйелдердің жұмыс орнында өздерін еркін әрі қауіпсіз сезінуі, әлеуметтік қолдау тетіктеріне қол жеткізуі партияның басты мақсатына айналмақ.
Жұмысшы әйел – отбасының ғана емес, елдің экономикалық дамуы мен әлеуметтік тұрақтылығының да негізгі тірегі. Сондықтан оларға қолайлы еңбек жағдайын жасау, денсаулығын қорғау, кәсіби әлеуетін арттыру – тек партияның емес, тұтас қоғамның ортақ міндеті.
Ақпарат Жамбыл облысы әкімдігі ақпраат және қоғамдық даму басқармасының мемлекеттік ақпараттық тапсырыс негізінде дайындалды
