Басқосуға ҚР Парламенті Мәжілісінің депутаттары Мұқаш Ескендіров пен Гүлдара Нұрым арнайы қатысты. Күн тәртібіндегі мәселе бойынша Жамбыл облысы әкімінің бірінші орынбасары Нұржан Календеровтың есепті баяндамасы тыңдалып, атқарылып жатқан жұмыстар мен алдағы жоспарлар жан-жақты талқыланды.
Айта кету керек, биылғы жылы партияның Сайлауалды бағдарламасын іске асыруға бағытталған Жол картасындағы 78 көрсеткіштің 11-і толық орындалған. Ал 46 көрсеткіш бойынша жұмыстар жалғасып жатыр. Қалған көрсеткіштердің жыл соңына дейін жүзеге асырылуы жоспарланған.
– «Ауыл шаруашылығын дамыту және азық-түлік қауіпсіздігін қамтамасыз ету» бағыты аясында биыл 270 млн теңгеге екі жобаны іске асыру жоспарланып отыр. Аталған жобалар жыл соңына дейін пайдалануға берілмек. Сондай-ақ, суармалы жерлердің көлемі 184,5 мың гектарға дейін ұлғаяды деп күтілуде. Сапалы тұқымдарды субсидиялауға бөлінген 700 млн теңгенің 39 млн теңгесі игерілді. Бұдан бөлек, 453 бірлік ауыл шаруашылығы техникасы мен 99,7 мың тонна минералды тыңайтқыш сатып алынды.
Әлеуметтік маңызы бар азық-түлік тауарларының бағасын тұрақтандыру мақсатында сауда үстемесін 15 пайыздан асырмау жөнінде 47 тауар өндіруші және 243 сауда нысанымен меморандум жасалды. Жыл басынан бері 51 ауыл шаруашылығы жәрмеңкесі ұйымдастырылды.
Ал «Жаңа жұмыс орындарын құру» бағыты бойынша есепті кезеңде 12,8 мың жаңа жұмыс орны ашылды. Сонымен қатар, субсидияланатын және бос жұмыс орындарына 12,9 мың азамат жұмысқа орналасты, оның ішінде 4,2 мыңы — жастар, – деді Нұржан Сәбитұлы.
Сондай-ақ, облыс әкімінің бірінші орынбасары Нұржан Сәбитұлы «Кәсіпкерлерді қолдау» міндеті бойынша да нақты нәтижелерге тоқталды. Оның айтуынша, өңірде жұмыс істеп тұрған шағын және орта бизнес субъектілерінің саны 106,4 мың бірлікті құрап, жоспар 9,7%-ға артығымен орындалған. Бұл секторда жұмыспен қамтылғандардың саны 166,3 мың адамға жеткен.
Сонымен қатар, ол Жол картасы аясындағы «Инфрақұрылымдық жүйелерді жақсарту», «Білім беру, денсаулық сақтау, мәдениет және спорт салаларының қолжетімділігін арттыру», «Жолдардың жақсы және қанағаттанарлық жағдайдағы үлесін көбейту», «Денсаулық сақтау қызметінің қолжетімділігін кеңейту» және «Мәдени нысандардың қолжетімділігін қамтамасыз ету» бағыттарында атқарылған жұмыстар туралы баяндап, алдағы жоспарлармен де бөлісті.
Жиын барысында инфрақұрылымды дамыту, ауыл тұрғындарының өмір сапасын жақсарту, әлеуметтік нысандар салу, ауыл шаруашылығы, кәсіпкерлік, туризм және халықты жұмыспен қамту бағыттарындағы жұмыстар да сөз болды. Бұл бағыттардағы жобалардың орындалуы фракция мүшелерінің тұрақты бақылауында болмақ.
Сонымен қатар, отырыста фракция мүшелері Андрей Савченко, Ерұлан Мағзымбеков және Эльмира Қойлыбаева депутаттық мандат аясында атқарған жұмыстары бойынша есеп берді. Олар өз сайлау округтеріндегі өзекті мәселелерді көтеріп, жергілікті билік пен халық арасында тиімді байланысты қамтамасыз етіп келе жатқанын жеткізді.
Жиынды қорытындылаған «AMANAT» партиясының Жамбыл облыстық филиалының төрағасы Дауыл Бейсенқұлов өз сөзінде:
«Жол картасы аясында жүзеге асырылып жатқан құрылыс жұмыстарын партиялық бақылауда ұстау — басты міндетіміз. Бұл бағытта фракция мүшелерін, партиялық бақылау комиссиясы мен партия белсенділерін кеңінен жұмылдырып, тұрақты мониторинг жүргізу қажет. Қорыта айтқанда, алдымызда тұрған ең маңызды міндет — халықтың әл-ауқатын арттыру. Сондықтан баршамыз халық сенімін ақтап, абыройлы әрі нәтижелі жұмыс істеуге күш салуымыз керек», – деді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
