Үстіміздегі жылдың 15 маусым күні Тараз қаласының әкімі Ғалымжан Әбдірайымов «АRAI PLAZA» бизнес орталығында қалалық «Алтын белгі» иегерлерін салтанатты түрде марапаттады.
Іс-шараға қалалық Мәслихат хатшылары мен облыстық «НұрОТАН» партиясы филиалының өкілдері, қала әкімінің орынбасарлары, Тараз қалалық білім бөлімінің басшысы, мектеп директорлары, ардагер педагогтар және ата-аналар қатысып, түлектерді тебірентерлік сәттерімен құттықтады.
Тараз қаласының әкімі «Алтын белгі» иегерлерін құттықтап, арнайы сыйлықтар тапсырды.
– Құрметті Жас түлектер! Сіздердей білімге құштар жалынды жастар үшін алынбайтын асу, бағынбайтын белес жоқ. Алған білімдеріңіз бен жігерлеріңізді, жастық жалындарыңызды Отанымыз – Қазақстанға арнау Сіздерге жүктелер басты міндет,— деді Ғалымжан Әбдірайымов.
Ағымдағы оқу жылында Тараз қаласындағы 54 орта мектеп пен 1 кешкі мектепті 2414 оқушы бітірді. Олардың 58-і «Алтын белгі», 29-ы үздік аттестат иегері атанды. Сондай-ақ, үстіміздегі жылы қаладағы орта мектепті бітірушілердің 24-і халықаралық, республикалық пән олимпиадалары мен ғылыми жоба жарыстарының жүлделі орындарын иеленді.
Салтанатты шара барысында түлектер жас түлектерінің салтанатты антын беріп, 11 жыл білім нәрімен сусындатқан ұстаздары мен ата-аналарына алғыстарын жаудырды.
Енді оларды алда үлкен сынақ күтіп тұр. Тағдыр мен таңдау жолындағы бұл емтиханнан әр түлек сүрінбей өтетініне сенім мол.