Тараз қалалық мәслихатының №3 сайлау округі бойынша депутат Серікбол Берікқожа Ю.Гагарин атындағы №29 орта мектеп мәжіліс залында сайлаушыларының алдында бір жылдық атқарылған жұмысы бойынша есеп берді.
Кездесуге Тараз қалалық Қоғамдық кеңесінің хатшысы А.Смайлов, Қоғамдық кеңестің Білім беру, денсаулық сақтау, мәдениет және әлеуметтік орта мәселесі бойынша комиссия төрайымы Ж.Орынбаева, қалалық №2 полиция бөлімшесінің №22 трек пунктінің учаскелік инспекторы, полиция капитаны М.Нурмаханбетов, кварталдық комитет төрағалары мен осы аумақтың тұрғындары қатысты.
Күн тәртібіндегі бірінші мәселе бойынша баяндама жасаған Серікбол Берікқожа 2016 жылдың наурызы мен 2017 жылдың наурыз аралығында қала көлемінде және өз сайлау округы бойынша атқарған жұмысына баяндама жасады. Ол өз сөзінде мәслихат қызметінің негізгі нысаны — сессия екендігін тілге тиек етіп, өткен жылы кезекті және кезектен тыс 18 сессияларда қала үшін маңызды қаулылар мен шешімдер шығарылғанын атап өтті.
Қалалық 2012-2019 жылдарға жоспарланған «Тараз қаласында газ тарату желісін жаңғырту» инвестициялық жобасы жүзеге асырылуда. Жаңа ғасыр талаптарына сай газбен қамтамасыз етудің жаңа технологияларына көшуді мақсат етіп отырған бағдарлама аясында, жалпы ұзындығы 936 шақырым жер асты газ құбырын жүргізу жоспарланған болатын. Алайда, осы мақсатта жүргізіліп жатқан жұмыстардан кейінгі қайта қалпына келтіру жұмыстарының сапасының төмендігі, аталған жұмыстардың ұзаққа созылуы, содан туындаған ыңғайсыздықтар туралы тұрғындар тарапынан түскен арыз-шағымдарға қатысты, құрамында депутаттар мен құзырлы органдардың өкілдері енген уақытша комиссия құрылып, осы жұмыстар жүргізіліп жатқан аумақтарға барып, жағдаймен танысып, депутаттар тарапынан мердігерлерге сапасыз жүргізілген жұмыстардың, зақым келтірілген су, жылу жүйелерін қайта қалпына келтіру жұмыстарын сапалыжүргізу және оны құзырлы органдардың бақылауға алуы туралы нақты ұсыныстар берілді, – деді Серікбол Берікқожа. Сондай-ақ халық қалаулысы алдағы депутаттық қызметіне қойылған мақсаттың бірі республикалық, облыстық немесе қала бюджетінен бекітілген қаражаттардың тиімді игерілуін қадағалау мақсатында «Нұрлы жол» мемлекеттік бағдарламасы шеңберінде «Нұр Отан» партиясы Тараз қалалық филиалының мәслихаттағы фракциясының тұрақты комиссиясының мүшесі ретінде жол, тұрғын үй, коммуникация желілерінің орындалуына бақылау орнату екенін жеткізді. Бұдан өзге өткен жылы №10 округ бойынша бірнеше көшелер күрделі және ағымдағы жөндеуден өткізілгенін атап өтті. Мәселен, Талыстого, Тастандиев көшелері, Қарасу 1,2,3 көшелері және Казахская көшелері жөнделіпті. Осы жылы да бұл үрдіс одан әрі жалғасатынын айтқан ол депутат ретінде осы аумақтын бірнеше көшелерін жөндеуге ұсыныс бергенін мәлім етті.
Жиында аталған аумақтың учаскелік инспекторы, полиция капитаны М.Нурмаханбетов сөз алып, 2017 жылдың 1 тоқсанында атқарылған жұмыстардың есебін берді. Аумақта ағымдағы жылдың 3 айы ішінде 102 қылмыс тіркелген, оның 55 ашылыпты. Олар 2 аса ауыр қылмыс болса, қалғаны ауырлығы орташа қылмыстар. Сонымен қатар ұзақ уақыт құрыққа түсіре алмай келе жатқан 8 адамнан құрылған қылмыстық топты құрықтаған. Олар есірткі сатумен ұзақ уақыт кәсіп еткен сыған азаматшалары екен. Бұдан өзге 145 әкімшілік құқық бұзушылық туралы хаттамалар толтырылып, әкімшілік жауаптылыққа тартылған.
Шынболат СЕЙДУАЛИЕВ
