Облыстық полиция департаментінің баспасөз қызметінің хабарлауынша, Көкшетау полиция басқармасына 47 жастағы ер адам өзіне шабуыл жасағаны туралы арызданды.
Жәбірленушінің сөзінше, 28 қаңтарда InDriver қосымшасы арқылы тапсырыс қабылдап, клиентті алып кеткен. Жолаушы рұқсатсыз көлік салонында темекі тұтатқан. Жүргізуші оған ескерту жасағанда, екеуі сөзге келіп қалған. Соңында такси жүргізушісі сапарды аяқтамақ болады. Көлікті тоқтатып, клиенттің шығуын өтініп, есікті ашқан. Алайда жолаушы жүргізушіге шабуыл жасап, оның денесіне зақым келтірген.
Полицейлер күдіктінің кім екенін анықтады. Аталған факті бойынша ҚР Қылмыстық кодексінің 109-1-бабының 1-бөлігі «Ұрып-соғу» бойынша сотқа дейінгі тергеу басталды. Сараптама тағайындалды, оның қорытындысы бойынша тиісті шаралар қабылданады.
Ақмола облысындағы жағдайға байланысты inDrive келесіні мәлімдейді:
«Біздің компаниямыз зорлық-зомбылықтың кез келген түрін қатаң айыптайды. Платформа пайдаланушылардың қауіпсіздігі – ең басты міндетіміз, сондықтан мұндай әрекеттерге мүлде жол берілмейді және аталған факт тіркелген жағдайлар болса, олар автоматты түрде қызметтен шеттетумен аяқталады.
Қазіргі уақытта аталған оқиға туралы inDrive қолдау қызметіне хабарлама түскен жоқ. Біз зардап шеккен жүргізушіні ішкі тергеу жүргізіп, тиісті шаралар қабылдау үшін, соның ішінде тәртіп бұзушының аккаунтын толық бұғаттауды қарастыра отырып, қолдау қызметіне хабарласуға шақырамыз.
inDrive тергеуге жәрдемдесу мақсатында құқық қорғау органдарының ресми сұрауына қажетті барлық ақпаратты ұсынуға дайын.»
