Бүгін Жамбыл облысы әкімдігінің баспасөз орталығында «Бюджет заңнамасының орындалуының тиімділігін арттыру жөніндегі іс-шаралар жоспары» бекітілгендігі туралы облыс әкімінің кеңесшісі Еркебұлан Дауылбаев, облыс әкімдігінің экономика және бюджетті жоспарлау басқарма басшысының орынбасары Сандуғаш Абдралиева, облыс әкімдігінің құрылыс, жолаушылар көлігі және автомобиль жолдары басқарма басшысының Рахман Аққозиев қатысуымен брифинг өтті.
Облыста бүгінгі таңда 299 жобалық-сметалық жұмыстары (ары қарай — ЖСҚ) әзірленуде. Оның ішінде, алдын ала құны анықталған 133 жоба бойынша іс-шара талаптарына сәйкес жүргізілген талдау нәтижесінде 18 млрд. теңгеге жуық бюджет қаражатын үнемделді. Бұл:
— біріншіден, жобалық сметалық құжаттарды оңтайландыру.
— екіншіден, бір қатары бойынша мәселені коммуналдық меншіктегі пайдаланылмай бос тұрған ғимараттарды бейімдеу арқылы шешу есебінен іске асырылады.
ЖСҚ құнының жоғары болуының тағы да бір факторы — ол сәулет жоспарлау тапсырмасының басынан дұрыс әзірленбеуі болып табылады. Оның алдын алу мақсатында іс-шарада жоспарланған құрылыс нысанының инфрақұрылымға қосылу нүктелерінен қашық болмауы, орналастыру жерінің дұрыс таңдалуы, техникалық шарттардың қолданыстағы инфрақұрылым жүйелеріне сәйкес болуы туралы талаптар қарастырылған.
Бүгінгі таңда келісім шарттарда кепілдік мерзімі 3 жыл болса, іс-шараға сәйкес 5 жылға ұзартылып, мердігердің жауапкершілігі күшейтіліп отыр.
Мердігер кепілдік мерзімі ішінде қолданыстағы нормативтерге сәйкес пайдалану нәтижесінде орын алған нысанның барлық кемшіліктері мен ақауларын өз қаражаты есебінен жоюға міндетті болады.
Нысанда кемшіліктер мен ақаулар кепілді мерзім ішінде анықталған жағдайда, мердігер тапсырыс берушіге кепілді мерзіміндегі жылға байланысты нысанда пайда болған кемшіліктер мен ақаулықтарын жою үшін қажетті жұмыстар мен тауарлардың құнынан бірінші жылы — 20%, екінші жылы — 15%, келесі жылдарда — 10% тұрақсыздық төлемін төлейді. Мердігердің жауапкершілігіне қатысты бұл талаптар жаңадан енгізіліп отыр.
TURANINFO.KZ
