8 наурыз — Халықаралық әйелдер күніне орай мерекелік шаралардың легі толастар емес. Бүгін, облыстық филармонияның ұйымдастыруымен «Баласағұн» орталық концерт залында салтанатты кеш өтті. Кештің алғы сөзін облыс әкімі Асқар Мырзахметов алып, нәзік жанды аруларды көктемнің алғашқы мерекесімен құттықтады. Жиынға қаламыздың арулары, ақ жаулықты аналар мен ардагер ұстаздар қатысты.
Есіктен кірген сәттен аруларды гүл шоқтарымен қарсы алған ұйымдастырушылар аналар мен қыздарға көтеріңкі көңіл-күй сыйлай білді. Филармония өнерпаздарынан құралған топ әсем әндері, мың бұралған ырғақты билерімен жұртшылықты тәнті етті. Кешті «Алатау» фольклорлық ансамблінің сүйемелдеуімен «Ақкербез» би ансамблі «Мереке» қазақ биімен ашып берді. Бұлбұл үнді әнші Оңал Азаматова, Тараз қаласының мақтанышы, елімізге танымал Ғани Мәтебаев, «Тараз» триосы, Жанна Асанқұлова және басқа әншілердің өнеріне риза болған келушілер ризашылықтарын білдіріп, қошемет көрсетіп жатты.
— «8 наурыз халықаралық әйелдер күні қарсаңында шын ықыласты құттықтауымды қабыл алыңыздар! Бұл мерейлі мереке – көңілге шуақ сыйлайтын жылылық пен сұлулықтың символына айналды деуге болады. Шуақты көктемнің алғашқы күндері осындай салтанатпен басталуы — табиғат пен тіршіліктің әсем үндестігіндей қабылданып келе жатыр. Ана – қоғамның тірегі. Отбасының шуағы. Тәрбиенің қайнар бұлағы, береке-бірліктің бастауы. Әйелсіз дүние жетім екені белгілі.
Аналар қауымы – ел ертеңіне нәр, тіршілікке әр беретін айрықша күшке ие. Болмысы бекзат, жаны жайсаң, жүрегі шуақ абзал Аналарға Тәңір қуат берсін!Өмірлеріңіз әрдайым нұрға, қуанышқа бөленсін, құшақтарыңыз гүлге тола берсін!Баршаңыз бақытты болыңыздар!»- деді Асқар Мырзахметов.
— «Бүгін бір керемет, ерекше күн. Әдемі де әсерлі кештің куәсі болып отырмыз. Ұйымдастырушыларға, облыстық әкімшілікке, білім саласы басқармасына алғысым шексіз. Ардагерлерді ұлықтап, сыйлап шақырғандарына ризамын. Осы концерттің әсерінен, бір жағынан көптен күткен көктем мезгілі келген соң, көңіліміз жарқырып, нұр шашып тұр. Барша аруларды мерекесімен құттықтаймын. Аналық батамды беремін. Ана қуанышы, әйел қуанышы — әр үйдің, отбасының, Отанның мерейі. Біздің қыз-келіншектің бәрі де бақытты болуға лайық»,- деп ағынан жарылды кеш қонағы, ардагер ұстаз Нұркен Нұрмаханқызы.
Айта кетейік, мерекелік кештің арнайы қонағы ретінде елімізге танымал жас әнші Қуандық Рахым шақырылып, әуезді әнімен көпшіліктің құрметіне бөленді.
Мөлдір Қуатқызы
