БІЗДІҢ ТАҢДАУЫМЫЗ
Елбасының бұл мақаласында қазіргі Қазақстанның басты рухани құндылықтары айқын көрініс тапқан. Бұл – мақала ғана емес, мазмұны терең, ауқымы өте кең, ұлт руханиятын ХХІ ғасыр биігіне көтеретін рухани жаңғыру бағдарламасы деуге болады.
Елбасы ғылым, білім, мәдениет пен тарихты тұтастай қамтитын ұлттық рухани жаңғыру бағдарламасын халық назарына ұсынып отыр.
Мақалада біздің еліміз мықты, әрі жауапкершілігі жоғары Біртұтас ұлт болу үшін болашаққа қалай қадам басатынымыз, бұқаралық санамызды қалай өзгерту керектігін Елбасымыз тайға таңба басқандай даралап, саралап түсіндіріп берді. Табысқа жетудің негізгі кілті ол – құндылықтар жүйесінде білімді бәрінен жоғары биікке қоятын ұлт қана жететіндігін айтты.
№17 И.Трубицын атындағы орта мектеп-гимназиясында «Болашаққа бағдар: рухани жаңғыру» мақаласын насихаттау бойынша ауқымды іс-шаралар ұйымдастырылып өткізілді. Соның бірі жалпы мектеп бойынша 1-11 сыныптарда «Болашаққа бағдар: рухани жаңғыру» тақырыбында ашық тәрбие сағаттары өткізілді. Мектеп қабырғасында аталған тақырыпта концерттік бағдарламалар ұйымдастырылып, оқушылар Отанға деген сүйіспеншілігін патриоттық әндерімен, билерімен жеткізе білді. Ал, «Туған жер» бағдарламасы аясында Жамбыл облысына ұйымдастырылған «Тарихи өлкетану» экспедициясына мектебімізден 9 «б» сынып оқушылары Ахтанбердиева Мадина, Әлімбекова Жанерке қатысып қайтты. Аудандық 8-11 сынып оқушылары арасында «Латын қарпіне көшу: заманауи зерттеу әдістері» тақырыбында өткізілген ғылыми жобалар байқауында 10 «ә» сынып оқушысы Қадырқұлова Жанеля І дәрежелі дипломмен марапатталса, 9 «ә» сынып оқушысы Жабыра Ұлмекен «Туған жерім тұғырым» атты Н.Ә.Назарбаевтың «Болашаққа бағдар: рухани жаңғыру» мақаласы аясында ұйымдастырылған аудандық шығармалар байқауында І орынды иеленді. Сондай-ақ, мектебімізде осы жылғы түлектер көгалдандыру, абаттандыру мақсатында ағаш отырғызып, сенбіліктер ұйымдастырды.
Сонымен қатар, Елбасы өз мақаласында қазіргі жаһандану заманында ұлттық бірегейлікті сақтап қалу, өркениеттің жақсысын алып, жаманынан жирену жөнінде өте құнды пікірлер айтты. Ендігі міндет – осы айтылғандарды іске асыру жолында аянбай еңбек ету.
Жасұлан ТҰРСЫНОВ,
№17 И.Трубицын атындағы орта мектеп-гимназиясының тарих пәнінің мұғалімі.
