ЖАЗАСЫН ӨТЕП ШЫҚҚАНДАР ЖҰМЫССЫЗ ҚАЛМАЙДЫ
Ағымдағы жылдың 8 желтоқсанында Жамбыл ауданы, Гродеково ауылдық округінің мәдениет үйінде Ішкі істер департаменті мен Қылмыстық атқару жүйесі департаменті және Жамбыл облысы әкімдігінің жастар саясаты мәселелері басқармасы біріге отырып, бірқатар шараларды ұйымдастырды. Аталмыш жұмыстар пробация қызметімен бірлесе жүргізілді. Жазасын өтеп шыққан және пробация қызметінде есепте тұрған жастармен Ішкі істер департаменті өкілдері жұмыс жасап, оларды қоғамға бейімделуіне көмек көрсетті. «Нәтижелі жұмыспен қамтуды үйлестіру және жаппай кәсіпкерлікті дамыту» тақырыбында өткізілген жиында жастардың жұмыспен қамтылуы, әлеуметтік және құқықтық көмек көрсетілуі, одан өзге мемлекеттік бағдарламалар түсіндіріліп, кәсіпкерлік дағдыларын үйрету мәселелері қозғалды.
Кездесуге аталған санаттағы 300-ге жуық жазасын өтеп шыққан жастар қатысып, оларға облыс әкімдігінің кәсіпкерлік және индустриалды-инновациялық дамыту, ауыл шаруашылығы, дін істері, білім, жұмыспен қамтуды үйлестіру және әлеуметтік бағдарламалар басқармалары мен Ішкі істер департаменті өкілдерінің тарапынан көптеген кеңестер берілді. Кездесуде қатысушы мақсатты топқа табыс көзін табуға жәрдемдесу, қылмыстық жазасын өтеген адамдарға әлеуметтiк және өзге де көмекті ұйымдастыру бағытында кең көлемде түсіндіру жұмыстары жүргізіліп, түрлі бағыттағы сауалдарға жауап берілді.
Рухани және материалдық маңызы зор шара барысында қатысушылар пікір алмасып, көкейінде жүрген сұрақтарына тұщымды жауаптарын алды.
Сонымен қатар биылғы жыл басынан «Елбасы Жолдауы-жаңғырудың жаңа кезеңі», «Рухани жаңғыру», «Болашаққа бағдар» атты автокеруендер барлық аудан орталықтары мен елдімекендерде болып, «Кеңес беру алаңдарын» ұйымдастырды.
Кеңес беру алаңдарында жалпы 15-тен астам саланың 30-дан астам өкілі тұрғындар мен барлық санаттағы жастарға кеңестер берді.
Автокеруен аясында ақпараттық-әдістемелік материалдар үлестіріліп, шеберлік сыныптары өткізілді. Сонымен қатар дін тақырыбында сауалнамалар алынып, «Адасқандар» және «Тағдыр тәлкегі» тақырыптарында қойылымдар көрсетілді. Пробацияда жүрген аудан жастарымен кездесулер өткізілді. Тегін медициналық скринингтік тексерулер ұйымдастырылды.
Жалпы, аталған автокеруен жұмысына 29 жасқа дейінгі 20 мыңнан астам жас қамтылды. Алдағы уақытта осындай маңызды, мақсатқа бағытталған шаралар ұйымдастырылатын болады.
