Жолым болмай жүр… Не істеуге болады? Жолымды ашатын дұғалар бола ма?

Жолым болмай жүр… Не істеуге болады? Жолымды ашатын дұғалар бола ма?
Бірінші мәселеде: Бұл дүние – сынақ орны. Сондықтан Алла Тағала бізді түрлі жолмен сынайды. Яғни, тоқшылық және аштықпен, байлық және кедейлікпен, денсаулық және аурумен. Сондықтан да кейде өзіңіз айтқандай кей кезде жолымыз болмай жатқанын табиғи нәрсе деп қабылдауымыз керек. Рас, кейде жолымыз тым ұзақ уақыт бойы болмай жатады. Осы жағдайда мына нәрсені ескерген жөн – біздің жолымыз болмауына, бастапқы мәселеде, біздің күнә-қателіктеріміз себеп.
Осындай жағдайда не істеуіміз керек? Ең алдымен тәубеге келу керек. Біз пенде болғаннан соң қандай болғанда да қателесеміз, күнә істейміз. Осы себептен күнәһар екенімізді мойындағанымыз жөн әрі біліп-білмей істеген күнәларымыз үшін өкінгеніміз жөн.
Келесі қадам: Өзін күнәһар екенін мойындағаннан соң пенде тым болмағанда «астағфирул-лаһ» (уа Алла Тағала, кешірші мені) деп айту керек. Негізі бұл екі сөзден тұратын тіркес өте күшті дұға. Бұл дұғаның қауһарлығына қазақтың «тас жарады, тас жармаса бас жарады» деген сөзді келтірсе болады. Тәубеге келіңіз, кейін көп истиғфар айтуды әдетке айналдырыңыз. Осының себебінен тез арада-ақ жағдайыңыз оңалып кетсе ғажап емес.
Келесі мәселе: Садақа беруді әдетке айналдыру керек. «Садақа беру» дегеніміз бір немесе он мың теңгені садақа ету беру емес. Бұл жерде бар мәселе ықылас-ниетте. Яғни, мұқтажға шын ықыласыңызбен 5-10 теңге берсеңіз немесе тіпті жейтін нанын алып берсеңіз де осының өзі садақа. Садақа болып жатқан, тіпті алда болайын деп жатқан пәленің басын қайтарады. Садақаның осы қасиеті қаперіңізден шықпасын.
Осы айтылған үш шараны ықыласпен істеп көріңіз. Құдай қаласа, тез арада Хақ Тағала жеңілдігін нәсіп етеді сізге.
Ал дұғаларға келсек…
اللَّهُمَّ إِنِّي أَعُوذُ بِكَ مِنَ الْهَمِّ وَالْحَزَنِ وَ الْعَجْزِ وَالْكَسَلِ وَالْجُبْنِ وَالْبُخْلِ وَغَلَبَةِ الدَّيْنِ وَقَهْرِ الرِّجَالِ
Аллаһуммә инни ә‘уузу бикә минәл-һәмми уәл-хазәни уәл-‘ажзи уәл кәсәли уәл-жубни уәл-бухли уә ғаләбәтид-дәйни уә қаһри-рижәәли.
Мағынасы: Уа, Аллам, мені уайым жеуден, қайғы-қасіреттен, дәрменсіздіктен, жалқаулықтан, қорқақтықтан, сараңдықтан, қарызға белшеден батудан және адамдардың зорлық-зомбылығынан сақтай гөр!
Белгілі сахаба Әбу Саид әл-Худри (р.а.) аталмыш дұғаға қатысты мына бір оқиғаны әңгімелеген:
Бірде Пайғамбарымыз (саллаллаһу аләйһи уә сәлләм) намаздан тыс уақытта мешітке кіргенінде ансарлық Әбу Үмәмә атты бір кісінің отырғанын көріп: «Әй, Әбу Үмәмә! Намаздан тыс уақытта мешітте не істеп отырсың?» − деп сұрайды. Ол: «Уа, Алланың елшісі! Қарызға белшеден батып, қатты қиналып отырмын», − деп жауап берді. Сонда, Пайғамбарымыз (саллаллаһу аләйһи уә сәлләм) оған: «Саған оқығаныңда уайым-қайғыңды сейілтіп, қарыздарыңнан Алланың Өзі құтқаратын бір дұға үйретейін бе? − дегенде, Әбу Үмәмә (р.а.): «Әлбетте, уа, Алланың елшісі!» − дейді. Сонда, Пайғамбарымыз (саллаллаһу аләйһи уә сәлләм) оған осы дұғаны үйретіп: «Бұл дұғаны таңертең және кешке үзбей оқып тұрғын» − дейді. Кейіннен Әбу Үмәмә: «Мен Пайғамбарымыздың (саллаллаһу аләйһи уә сәлләм) бұйырғанын бұлжытпай орындап жүрдім. Соңында Алла Тағала менің барлық уайым-қайғымды сейілтіп, қарыздарымнан да толық құтылдым», − деген болатын (Сунәну Әби Дәууд, Китәбу ас-саләәт 1330).
Дұғаның тез қабыл болуы үшін…
Әнас ибн Мәліктің (р.а.) жеткізуі бойынша бір күні Алла елшісінің (саллаллаһу аләйһи уә сәлләм) жанында отырғанда дұға жасап отырған бір адамды көреді. Пайғамбарымыз (саллаллаһу аләйһи уә сәлләм) сонда Әнастан: «Әлгі кісінің не деп дұға жасағанын және неге байланысты дұға жасап жатқанын білесің бе? – деп сұрайды да артынша сұраққа өзі жауап беріп былай дейді: «Ол еткен дұғасы сол сәтте қабыл болатындай етіп Оның ең маңызды есімдерін атап, Аллаға жалбарынуда, Алладан сұрауда».
Әлгі дұғаның оқылуы былай болады:
يَا بَدِيعَ السَّمَوَاتِ وَ الْأرْضِ يَا حَىُّ يَا قَيُّومُ إِنِّى أَسْأَلُكَ
«Йә бадиғас самауати уал ард йа хаййу йа қаййум инни әсалукә».
Мағынасы: «Уа, Раббым! Аспан мен жерді жаратқан, мәңгі тірі, зиянсыз Жаратушы Ием өзіңнен сұраймын» (Бұхари, Әдәбул-муфрад, 195).
Хақ Тағала сізді өз қамқорлығына алып, сізге рахметін жаудырсын. Ең қамықпаңыз! Алла Тағаланың рахметінен күдер үзбеңіз. Үмітсіз шайтан.
Қанат ҚУАНЫШБЕКОВ,
«Айсұлу ана» мешітінің бас имамы.