Жергілікті арна жаңа атауға ие болды.
Бүгін Жамбыл облыстық музей ғимаратында «Қазақстан» телерадиокорпорациясының бастамасымен жергілікті телеарнаның жаңа маусымының презентациясы өтті. Жаңа бастаманың ерекшелігі бұдан былай еліміздің бас арнасы мен облыстардағы филиалдарының атаулары латын әріптерінде жазылады. Арнадағы көптеген бағдарламалар сұрыпталып, жаңа форматтағы тың идеялар жүзеге асырылады. Ұлттық арнаның атауы «Qazaqstan» болса, Жамбыл облыстық филиалы «Jambyl» болып өзгертілді.
Тұсаукесерге келген зиялы қауым өкілдері мен журналистер алдымен музей экспонаттарымен танысты. Оның ішінде «ЭКСПО-2017» халықаралық көрмесінде Жамбыл облысы мәдени күндерінде музейге сый ретінде берілген голографиялық экран меймандардың назарын аударды.
Әрі қарай, бұдан былай «Jambyl» деп аталатын телеарнаның басшысы Мейрамбек Төлепберген музейдегі 25 жылдық тарихы бар жергілікті арнаға арналған залды келушілерге таныстырып, алдағы уақыттағы телеарнаның жұмысы туралы айтып берді. Ребрендинг нәтижесінде «Jambyl» телеарнасының логотипі мемлекеттің туы іспеттес болып жасалды. Осы өзгеріс арқылы ұлттық арнаның барлық филиалдары тұтас ірі медиаактив екені әйгіленетін болады.
Осылайша 28 тамыздан бастап арна өз өнімдерін көрерменге жаңа дизайнда, жаңа атаумен ұсынатын болады. Заманауи үрдіске қарай қол созған арнаның жұмысы әрі қарай да жүйелі әрі мазмұнды болғай деп тілейміз.
Арайлы Жақсылық
