Жамбыл облысында 5000 алимент төлемдері жеке сот орындаушыларға өтпей отыр
Өңірлік коммуникациялар қызметі алаңында Жамбыл облысы Әділет департаменті басшысының орынбасары Жайықбай Шалдаровтың қатысуымен «Жамбыл облысында жеке сот орындаушылар институтының дамуы» туралы брифинг өтті.
Жайықбай Шалдарұлының мәлімдеуінше, бүгінгі күні облысымызда 65 жеке сот орындаушы халыққа қызмет көрсетуде және олардың атқаруына 6 айдың көрсеткіші бойынша жалпы құны 62,8 млрд. тенгені құрайтын 102 мың атқару өндірісі түскен. Оның 11,9 млрд. тенгені құрайтын 32 727 атқару өндірісі аяқталып отыр.
Алимент төлемдерін өндіру бойынша 6 800 атқару өндірісі орындауға түсіп, оның 936 атқару өндірісі аяқталған.
Мемлекет пайдасына айыппұл өндіру бойынша 718 млн. теңгені құрайтын 44 644 атқару өндірісі орындауда болып, оның 321млн.теңгені құрайтын 20 580 атқару өндірісі аяқталған.
Осы көрсеткіштер, жеке сот орындаушылар институтының бүгінгі таңда өз аяғына нық тұрып, халыққа қызмет көрсетудің құралына айналғанына дәлел.
Ерекше атап өтетін мәселе, бүгінгі күні жеке сот орындаушылардың алимент төлемдерін өндіру құжаттарын орындауда талпынысын арттыру мақсатында, мемлекеттен ақшалай әр атқару құжатының талаптарын орындағаны үшін жылына 5 АЕК (11345) сыйақы қарастырылған.
Осы ретте әділет министірінің 2015 жылдың 27 қарашасындағы №595 бұйрығына сәйкес, жеке сот орындаушылардың алимент төлемдерін өндіру бойынша көрсеткен қызметі үшін биылғы жылға облысымызға 19,8 млн.теңге бөлініп, оның 1,5 млн. теңгесі игерілді.
Осындай жасалған жағдайға қарамастан, облысымызда мемлекеттік сот орындаушылардағы 5000 алимент төлемдерін өндіру құжаттары жеке сот орындаушыларға өтпей отыр.
Бұл атқару құжаттарының жеке сот орындаушыларға өтпеу себебі, өндірішілерде жеке сот орындаушылардың қызметі, олардың жауапкершілігі туралы ақпарат жоқтығынан деп білемін.
Сондықтан ақпарат ретінде, жеке сот орындаушының іс-әрекетінің дұрыстығы соттық және прокурорлық, одан қалса әділет департаментімен қадағаланады. Жеке сот орындаушы заң талабын орындамаған жағдайда лицензиясының қолданысы тоқтата тұрылу немесе лицензиясының күші жойылу қаупі, Заңмен көзделген. Бұл оның сот шешімін дұрыс және уақытында орындауға қосымша септігін тигізеді.
Жеке сот орындаушылардың іс-әрекетіне келтірілген арыз шағымдар бойынша әділет департаменті осы жылдың 6 айында келесі жұмыстарды атқарды.
Атап айтқанда, Департаментке жеке және заңды тұлғалардан жеке сот орындаушыларының әрекетіне келтірілген 170 өтініш келіп түскен, оның ішінде 15 арыз қараусыз қалдырылып, 135 не түсіндірме берілді. 20 өтініш бойынша жоспардан тыс тексеріс жүргізіліп, нәтижесінде жеке сот орындаушының тәртіптік жауапкершілігін шешу үшін Жамбыл облысының өңірлік палатасына 9 ұсыныс жолданып, ҚР Әділет министрлігіне жолданған ұсыныстар бойынша 2 жеке сот орындаушысының лицензиясының қолданысы 6 айға тоқтатылды. Сонымен қатар, Қазақстан Республикасының заңнамасын бірнеше рет бұзғаны, оның ішінде мемлекеттің, жеке және заңды тұлғалардың мүдделеріне нұқсан келтіргені үшін 1 жеке сот орындаушы лицензиясынан айырылды, — деп Жайықбай Шалдаров баяндады.
