Күздің шуақты әрі қолайлы күндерін тиімді пайдаланған Жамбыл облысы Тараз гарнизонындағы «Оңтүстік» өңірлік қолбасшылығы штабының жеке құрамы ұйымшылдық танытып, ауқымды экологиялық тазалық акциясын ұйымдастырды. Дәстүрлі түрде ұйымдастырылатын бұл игі шара мемлекеттік деңгейдегі тазалық пен абаттандыру науқандарымен үндесіп қана қоймай, әскери ұжымның бірлігін тағы бір мәрте паш етті.
Аталмыш экологиялық бастаманың басшысы әрі басты ұйтқысы — «Оңтүстік» өңірлік қолбасшылығы әскерлері қолбасшысының бірінші орынбасары – штаб бастығы, полковник Бекболат Габдуллин болды. Ол бұл шараның маңыздылығына тоқталып: «Тазалық әрқайсымыздан басталады. Әскери қызметшілер үшін штаб – бұл екінші үй, өйткені өміріміздің әрі қызметіміздің басым бөлігі осы қабырғада өтеді. Өз туған шаңырағымыз бен қызмет етіп жатқан ортамыздың тазалығына тек өзіміз ғана шынайы жауапкершілікпен қарап, қамқорлық жасай аламыз», – деп атап өтті.
Жетекшінің бұл сөзін қолдаған «Оңтүстік» өңірлік қолбасшылығы басқармасының офицерлері демалыс күніне қарамастан жұмыла іске кірісті. Күнделікті қызметтік киімдерін ыңғайлы азаматтық киімге алмастырған офицерлер мен әскери қызметшілер қолдарына күрек, тырма, вилы және сыпырғыш алып, штаб аумағын түгелдей абаттандыруға кірісті. Күнделікті қағаз бастылық пен штабтық жұмыстан қол үзіп, таза ауадағы дене еңбегіне белсене атсалысқан әскерилер үлкен ұйымшылдық көрсетті.
Айта кетерлік жайт, штаб аумағы мен оған тиісті аймақ әрдайым ұқыпты ұсталып, үнемі тазалық сақталатын. Мұның артында күнделікті тіршілікті қамтамасыз етіп отырған штаб батальонының тынымсыз еңбегі тұр. Десе де, бұл жолы басқарма офицерлері мен басшылық құрамның өзі тікелей үлес қосып, әдеттегі тазалықты жаңа деңгейге көтерді. Нәтижесінде штаб маңы бұрынғыдан да көріктеніп, тазарып шыға келді.
Қатысушылардың айтуынша, мұндай ортақ шаруа тек қана аумақты тазартумен шектелмейді, бұл – ерекше бір тәрбиелік мәні бар шара. Әскерилер бұл сенбілікке ерекше көңіл-күймен келіп, оны өзінше бір «тимбилдинг» – ұжымды біріктіретін шара ретінде бағалады. Қызметтік кабинеттерден тыс, бейресми жағдайда әзіл-қалжыңмен өрбіген әңгімелер мен ортақ еңбек әскери қызметшілердің өзара бауырмалдығын арттыра түсті.
Осындай бірлескен іс-әрекеттер мен үлгілі бастамалар әскери қауымдағы өзара сыйластықты нығайтып қана қоймай, жас буын сарбаздарға да үлкен өнеге болары сөзсіз.






