Жамбыл облысында азаматтық бастамаларды қолдау және үкіметтік емес ұйымдардың жобалық әлеуетін арттыру бағытындағы жұмыстар жалғасуда. «Jambyl Civil Hub» және «Ортақ мүдде» шағын гранттары аясында әлеуметтік жобаларды жүзеге асырып жатқан бірқатар қоғамдық ұйымдарға менторлық қолдау көрсетілді.
Менторлық кездесулердің негізгі мақсаты – грант иегерлеріне жобаларды сапалы әрі нәтижелі жүзеге асыруға әдістемелік және практикалық көмек беру, жұмыс барысында туындайтын мәселелерді бірлесіп шешу, ықтимал тәуекелдерді алдын ала анықтау және жоспарланған нәтижелерге қол жеткізуге ықпал ету.
Байзақта қоғамдық бастамаға қолдау көрсетілді
2026 жылғы 25 тамызда Байзақ ауданындағы «Қоғамдық келісім» орталығында «Jambyl Civil Hub» шағын гранттар конкурсының жеңімпазы «Нұрбата-Ардагер» қоғамдық бірлестігімен менторлық кездесу өтті.
Кездесуге «Елім-ай Достық» қоғамдық бірлестігінің төрағасы Полина Александровна Ким ментор ретінде қатысып, гранттық жобаның жүзеге асырылу барысымен танысты.
Кездесу барысында атқарылған жұмыстар сараланып, жобаны іске асыру кезінде туындаған өзекті мәселелер талқыланды. Ментор бастамашы топ өкілдерінің сауалдарына жауап беріп, алдағы жұмысты тиімді ұйымдастыру, жоспарланған міндеттерді сапалы орындау және жобаның нәтижелілігін арттыру бойынша практикалық ұсынымдар берді.
Таразда отбасылық байланыстарды қалпына келтіру мәселесі талқыланды
Менторлық қолдау жұмыстары Тараз қаласында да жалғасты. 2026 жылғы 3 қыркүйекте Жамбыл облысы Полиция департаментінің ғимаратында «Ортақ мүдде» шағын гранттар конкурсының жеңімпазы – «Қазақстан Республикасының Ұлттық Қызыл Жарты Ай қоғамы» қоғамдық бірлестігінің Жамбыл облыстық филиалымен кездесу ұйымдастырылды.
Кездесу аясында «Отбасылық байланыстарды қалпына келтіру» жобасы бойынша ашық диалог өтті. Оған құқық қорғау органдарының өкілдері, менторлар және азаматтық қоғам белсенділері қатысты.
Тараптар түрлі себептермен жақындарынан көз жазып қалған немесе қиын өмірлік жағдайға тап болған отбасыларға құқықтық, әлеуметтік және психологиялық қолдау көрсету тетіктерін талқылады.
Менторлар жобаның жүзеге асырылу барысымен және белгіленген индикаторлармен танысып, ұйымдастырушылық мәселелер мен жұмыс барысында туындаған сұрақтар бойынша нақты ұсыныстар берді. Сонымен қатар жобаны жүзеге асыру кезінде кездесуі мүмкін тәуекелдерді алдын ала анықтау және оның тұрақты нәтижесін қамтамасыз ету мәселелеріне назар аударылды.
«Жанұя» жобасы аясында «Мектепке жол» акциясы өтті
Сол күні Тараз қаласында «Jambyl Civil Hub» шағын гранттар конкурсының тағы бір жеңімпазы – «Кәусар Тараз» қоғамдық бірлестігімен менторлық кездесу ұйымдастырылды.
Бірлестіктің қабылдау орталығында өткен кездесуде «Жанұя» әлеуметтік жобасының жүзеге асырылу барысы қаралды. Жоба аясында жаңа оқу жылы қарсаңында дәстүрлі «Мектепке жол» акциясы өткізіліп, көпбалалы отбасыларға қолдау көрсетілді. Оқушыларға қажетті оқу құралдары мен мектеп керек-жарақтары табысталды.
Ментор қоғамдық бірлестік өкілдерімен жобаның алғашқы нәтижелерін талқылап, алдағы іс-шараларды ұйымдастыру, мақсатты топпен жұмысты жетілдіру және жоспарланған көрсеткіштерге қол жеткізу бойынша ұсынымдар берді.
Менторлық қолдау – жобаның нәтижелілігін арттыратын құрал
Менторлық сүйемелдеудің маңызы тек грант қаражатын тиімді игерумен шектелмейді. Мұндай қолдау үкіметтік емес ұйымдардың жобаларды басқару тәжірибесін жетілдіруге, ұйымдастырушылық әлеуетін күшейтуге, туындаған мәселелерді дер кезінде шешуге және әлеуметтік бастамалардың тұрақтылығын қамтамасыз етуге мүмкіндік береді.
Байзақ ауданы мен Тараз қаласында өткен кездесулер барысында грант иегерлеріне жеке бағыттар бойынша практикалық ұсынымдар беріліп, тәжірибе алмасуға және мемлекеттік органдар мен азаматтық қоғам өкілдерінің өзара байланысын нығайтуға жағдай жасалды.
Осылайша, шағын гранттар аясындағы менторлық сүйемелдеу қаржылай қолдауды кәсіби және әдістемелік қолдаумен ұштастырып, қоғамдық ұйымдардың әлеуметтік мәселелерді шешуге бағытталған бастамаларын сапалы жүзеге асыруына мүмкіндік беруде.
Алдағы уақытта да грант иегерлерімен осындай менторлық кездесулер өткізіліп, жобалардың орындалу барысына әдістемелік және практикалық қолдау көрсету жұмыстары жалғасады.
