Лаос Президенті Тхонглун Сисулит Қазақстанға сапары екі ел арасындағы достық қарым-қатынастарды одан әрі нығайту мен өзара ынтымақтастықты кеңейтудің маңызды кезеңі екенін атап өтті.
Лаос Президенті Қазақстанды Орталық Азиядағы Лаоспен дәстүрлі түрде достық әрі тұрақты қарым-қатынас орнатып келе жатқан мемлекеттердің бірі ретінде бағалайтынын жеткізді.
Тхонглун Сисулиттің айтуынша, Қазақстан мен Лаос арасындағы байланыстардың негізі өзара құрмет пен қолдауға, сондай-ақ тарихи достыққа сүйенеді. Екі ел арасындағы қарым-қатынастар әлемдегі түрлі өзгерістерге қарамастан, өзінің берік сипатын сақтап келеді.
«Бүгінгі сапар екі ел арасындағы достық байланыстарды одан әрі нығайтуға және кеңейтуге ықпал етеді», – деді Лаос Президенті.
Қазақстанның білім саласындағы қолдауы атап өтілді
Лаос Президенті Қазақстанның лаостық мамандарды даярлауға қосқан үлесіне ерекше тоқталды.
Оның сөзінше, жүздеген Лаос азаматы Қазақстанның жоғары оқу орындарында білім алып, бүгінде мемлекеттік қызметте, кәсіпкерлік саласында, сондай-ақ орталық және жергілікті деңгейдегі басшылық қызметтерде еңбек етіп жүр.
Тхонглун Сисулит қазақстандықтардың лаостық студенттерге көрсеткен қолдауын жоғары бағалап, Қазақстанда білім алған азаматтардың елге деген жылы ықыласын атап өтті.
Келіссөздер қорытындысы бойынша Қазақстан Президенті Қасым-Жомарт Тоқаев пен Лаос Президенті Тхонглун Сисулит екіжақты ынтымақтастықты одан әрі дамытуға және кеңейтуге екі елдің де мүдделі екенін растайтын Бірлескен мәлімдемеге қол қойды.
Бұл келісім Қазақстан мен Лаос арасындағы саяси, экономикалық, білім беру және басқа да салалардағы өзара байланысты жаңа деңгейге көтеруге бағытталған маңызды қадам болмақ.
