Соңғы жылдары сот қызметінде цифрлық технологиялардың кеңінен енгізілуі құжаттарды рәсімдеуді жеңілдетіп, сот процестеріне қатысушылар үшін уақыт пен шығынды азайтуға мүмкіндік берді. Сонымен қатар соттардың қоғаммен байланысы күшейіп, ақпараттың ашықтығына да басымдық беріліп келеді.
ҚР Сот әкімшілігінің Жамбыл облысы бойынша департаментінің мәліметінше, өңір соттарында сот төрелігінің ашықтығын, жариялылығын және азаматтар үшін қолжетімділігін қамтамасыз ету жұмыстары жүйелі түрде жүргізілуде.
Бүгінде сот жүйесінде заманауи цифрлық сервистер кеңінен қолданылады. Бұл қызметтер азаматтарға талап-арыздар мен өзге де құжаттарды электрондық форматта жолдауға, соттан келетін хабарламаларды онлайн алуға, іс материалдарымен қашықтан танысуға және заңнамада көзделген жағдайларда бейнеконференцбайланыс арқылы сот отырыстарына қатысуға мүмкіндік береді.
Мамандардың айтуынша, цифрлық сервистерді енгізу сотқа жүгіну рәсімін жеңілдетіп, азаматтардың уақытын үнемдеуге және сот қызметінің тиімділігін арттыруға ықпал етіп отыр.
Соттардың ашықтығын қамтамасыз ету мақсатында бұқаралық ақпарат құралдарымен де тұрақты жұмыс жүргізіледі. Өзекті істер бойынша баспасөз хабарламалары жарияланып, қабылданған сот актілері мен қолданыстағы заңнамадағы өзгерістерге қатысты түсіндіру жұмыстары тұрақты ұйымдастырылады.
Бұдан бөлек, соттар халықпен тікелей байланысты нығайту үшін брифингтер, дөңгелек үстелдер, ашық есік күндерін өткізіп, мемлекеттік органдардың өкілдерімен, заң қоғамдастығымен және жастармен кездесулер ұйымдастырып келеді. Бұл іс-шаралар азаматтардың құқықтық сауатын арттыруға және сот қызметі туралы ашық ақпарат ұсынуға мүмкіндік береді.
Соттардың қызметіне қатысты жаңалықтар мен ресми ақпараттар интернет-ресурстар мен әлеуметтік желілердегі ресми парақшаларда тұрақты түрде жарияланып отырады. Бұл азаматтарға қажетті ақпаратты жедел алуға және сот жүйесіндегі жаңашылдықтармен уақытылы танысуға жағдай жасайды.
Департамент мәліметінше, сот жүйесіне деген қоғамдық сенімнің маңызды көрсеткіштерінің бірі – сот процестеріне қатысушылардың кері байланысы. Жамбыл облысының соттарына азаматтар мен заңды тұлғалардың өкілдерінен судьялар мен сот аппараты қызметкерлерінің кәсібилігіне, объективтілігіне, заң талаптарын сақтауына және процеске қатысушыларға құрметпен қарауына қатысты алғыс хаттар тұрақты түрде келіп түседі.
Сонымен қатар бұқаралық ақпарат құралдары мен әлеуметтік желілерде өңір соттарының қызметіне қатысты оң пікірлер мен жарияланымдар да тұрақты жарияланып келеді.
Мамандардың айтуынша, цифрлық сервистерді дамыту, ақпараттың ашықтығын қамтамасыз ету және қоғаммен тиімді коммуникация орнату сот төрелігінің қолжетімділігін арттырып, азаматтардың сот жүйесіне деген сенімін нығайтуға ықпал етуде.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
