Ұлттық домбыра күніне орай Мойынқұм аудандық мәдениет үйі мен аудандық жастар ресурстық орталығының бірлескен ұйымдастыруымен Қайрат Рысқұлбеков атындағы саябақта «Домбыраның күмбірі саябақты әуезге бөледі» атты мазмұнды мәдени-көпшілік шара өтті.
Мерекелік іс-шараның басты мақсаты – қазақ халқының төл өнерін дәріптеу, ұлттық құндылықтарды кеңінен насихаттау, жас ұрпақтың бойында ұлттық мәдениетке деген құрмет пен қызығушылықты қалыптастыру, сондай-ақ домбыра өнерінің рухани-мәдени маңызын кеңінен таныту болды.
Шара барысында аудандық мәдениет үйінің өнерпаздары мен домбырашылары қазақтың дәстүрлі күй өнерінің інжу-маржандарын орындап, халқымыздың бай музыкалық мұрасын көпшілікке паш етті. Сонымен қатар ұлттық нақыштағы әндер шырқалып, көрермендерге көтеріңкі көңіл күй мен ерекше рухани әсер сыйлады.
Саябаққа жиналған аудан тұрғындары, жастар мен қонақтар қазақтың күй өнерінен тағылым алып, ұлттық музыка арқылы халқымыздың тарихы мен мәдениетінің тереңдігін сезінді. Домбыраның қоңыр үні мерекелік кештің көркін аша түсіп, ұлттық өнердің өміршеңдігін тағы бір мәрте айқындады.
Бағдарламаның ерекше бөлігінің бірі балалар мен жасөспірімдерге арналған танымдық ойындар мен викториналар болды. Қатысушыларға домбыраның шығу тарихы, оның құрылысы, қазақ мәдениетіндегі орны, белгілі күйші-композиторлар мен ұлттық өнерге қатысты қызықты сұрақтар қойылды. Белсенділік танытып, дұрыс жауап берген бүлдіршіндерге ұйымдастырушылар тарапынан арнайы сыйлықтар табысталды.
Мұндай танымдық іс-шаралар жас ұрпақтың ұлттық мұраға деген қызығушылығын арттырып қана қоймай, олардың халқымыздың рухани құндылықтарын тереңірек тануына мүмкіндік береді. Сонымен қатар жастардың ұлттық өнерге деген сүйіспеншілігін қалыптастыруға және мәдени мұраны сақтау ісіне үлес қосуға бағытталған.
Домбыра – қазақ халқының ғасырлар бойы қалыптасқан рухани дүниесінің, тарихы мен салт-дәстүрінің ажырамас бөлігі. Қасиетті қара домбыраның үні ұлттың өткені мен бүгінін жалғайтын алтын көпір іспеттес. Сондықтан Ұлттық домбыра күнін атап өту – төл мәдениетімізді ұлықтаудың, ұлттық бірегейлікті нығайтудың және рухани мұраны кейінгі ұрпаққа насихаттаудың маңызды тетігі.
Мойынқұм ауданында ұйымдастырылған мерекелік шара ұлттық өнердің мәртебесін көтеріп, тұрғындардың мәдени өміріне ерекше серпін берді. Осындай тағылымды бастамалар арқылы ұлттық құндылықтарымыз кеңінен насихатталып, халқымыздың бай мәдени мұрасы ұрпақтан ұрпаққа жалғаса бермек.
Ұлттық өнеріміздің мерейі үстем болып, қасиетті қара домбыраның күмбірі әрдайым қазақ елінің әр шаңырағынан естіле берсін!
Материал «Мойынқұм ауданы әкімдігінің ішкі саясат бөлімі» КММ тапсырысы бойынша әзірленді.
