Мойынқұм ауданының әкімі Ермек Карентаев жұмыс сапарымен Бірлік ауылына барып, елді мекендегі бірқатар әлеуметтік және инфрақұрылымдық нысандарды аралап, атқарылып жатқан жұмыстардың барысымен танысты.
Алдымен аудан басшысы ауылдағы спорт кешенінде жүргізіліп жатқан жылу жүйесін жаңарту жұмыстарының орындалуын көрді. Нысанда мердігер ұйым өкілдері мен жауапты мамандар атқарылған жұмыстар туралы баяндап, алдағы жоспарларымен бөлісті. Аудан әкімі жөндеу жұмыстарының сапасына ерекше көңіл бөліп, барлық жұмыстардың белгіленген мерзімде әрі талапқа сай аяқталуы қажет екенін атап өтті. Сондай-ақ жауапты тұлғаларға құрылыс-монтаж жұмыстарының сапасын тұрақты бақылауда ұстау жөнінде нақты тапсырмалар берілді.
Жұмыс сапары барысында аудан әкімі ауыл тұрғындарын сапалы ауыз сумен қамтамасыз ету мақсатында жүзеге асырылып жатқан жобаның орындалу барысымен де танысты. Қазіргі таңда ауыл көшелерінде әрбір тұрғын үйге ауыз су құбырларын тарту жұмыстары жүргізілуде. Бұл жоба ауыл халқының тұрмыс сапасын арттырып, тұрғындардың орталықтандырылған ауыз суға қолжетімділігін кеңейтуге мүмкіндік береді.
Посмотреть эту публикацию в Instagram
Ермек Амангелдіұлы аталған жұмыстардың маңыздылығына тоқталып, халық игілігі үшін қолға алынған жобалардың сапалы жүзеге асырылуы басты міндет екенін жеткізді. Сонымен қатар мердігер мекемелер мен жауапты бөлімдерге құрылыс қарқынын бәсеңдетпей, жұмыстарды уақытылы аяқтау қажеттігін ескертті.
Сапар аясында аудан әкімі ауылдың тұрмыстық қатты қалдықтар полигонының жағдайымен де танысты. Нысанның облыстық маңызы бар автожолға жақын орналасуына байланысты аудан басшысы аталған мәселені жан-жақты зерделеп, полигон үшін баламалы орын қарастыруды тапсырды.
Аудан әкімі тұрмыстық қатты қалдықтарды орналастыру кезінде экологиялық қауіпсіздік талаптарының қатаң сақталуы керектігін атап өтті. Сондай-ақ қоршаған ортаға кері әсерді болдырмау, санитарлық нормаларды сақтау және халықтың денсаулығына қауіп төндірмеу мәселелері әрдайым басты назарда болуы тиіс екенін айтты.
Жұмыс сапарының қорытындысы бойынша аудан басшысы барлық нысандарда жүргізіліп жатқан жұмыстардың сапалы әрі белгіленген мерзімде орындалуы тұрақты бақылауда болатынын жеткізді. Елді мекендердің инфрақұрылымын дамыту, тұрғындардың өмір сүру сапасын арттыру және қолайлы орта қалыптастыру бағытындағы жұмыстар алдағы уақытта да жалғасатын болады.
