Мойынқұм ауданында ауданның құрылғанына 60 жыл толуы және қазақтың әйгілі шопаны, екі мәрте Социалистік Еңбек Ері Жазылбек Қуанышбаевтың туғанына 130 жыл толуына арналған мерекелік іс-шаралар жоғары деңгейде ұйымдастырылды.
Айтулы мерекеге Жамбыл облысының әкімі Ербол Қарашөкеев, Қазақстан Республикасы Президентінің кеңесшісі Мәлік Отарбаев, Қазақстан Республикасы Парламенті Мәжілісінің депутаттары, мемлекет және қоғам қайраткерлері, зиялы қауым өкілдері, еңбек ардагерлері, спортшылар мен аудан тұрғындары қатысты.
Мерекелік жиын барысында Қазақстан Республикасы Президентінің кеңесшісі Мәлік Отарбаев сөз сөйлеп, Мемлекет басшысы Қасым-Жомарт Тоқаевтың құттықтауын жеткізді. Ол өз сөзінде Мойынқұм өңірінің еліміздің әлеуметтік-экономикалық және рухани дамуына қосқан үлесіне тоқталып, еңбек адамының мәртебесін көтеру мен тарихи тұлғалардың мұрасын дәріптеудің маңыздылығын атап өтті.
Сондай-ақ, Жазылбек Қуанышбаевтың өнегелі өмір жолы мен ерен еңбегі бүгінгі ұрпаққа үлгі екені айтылып, оның қазақ даласындағы мал шаруашылығын дамытуға қосқан өлшеусіз үлесі ерекше аталып өтті.
Мерекелік бағдарлама аясында ұлттық спорт түрлерінен жарыстар ұйымдастырылып, аудан ауылдарынан келген жастар өзара бақ сынасты. Атап айтқанда, түйе палуан, қазақша күрес және қой көтеру сайыстары өткізіліп, қатысушылар күш-жігері мен шеберліктерін көрсетті.
Ұлттық спорт жарыстары көрермендердің ерекше қызығушылығын тудырып, салт-дәстүр мен ұлттық құндылықтарды дәріптеудің жарқын үлгісіне айналды. Жарыс барысында палуандар мен спортшылар өздерінің жоғары дайындық деңгейін көрсетіп, көпшіліктің ыстық ықыласына бөленді.
Әсіресе қазақша күрес бәсекелері тартысты өтіп, спортшылар арасында нағыз мықтылар анықталды. Ал түйе палуан сайысы ұлттық спорттың ерекшелігін айшықтап, көрермендерге ерекше әсер сыйлады.
Іс-шараның басты мақсаты – жастар арасында салауатты өмір салтын насихаттау, ұлттық спорт түрлерін дамыту және қазақ халқының бай мәдени мұрасын дәріптеу болды. Сонымен қатар, мұндай жарыстар жас ұрпақты батылдыққа, төзімділікке, намысшылдыққа және отансүйгіштікке тәрбиелеуге ықпал етеді.
Мерекелік күн аясында ұйымдастырылған спорттық және мәдени іс-шаралар аудан тұрғындары мен қонақтарына көтеріңкі көңіл-күй сыйлап, ел бірлігі мен ұлттық рухтың айқын көрінісіне айналды.
Мойынқұм ауданының 60 жылдығы мен Жазылбек Қуанышбаевтың 130 жылдығына арналған мерейтойлық шаралар өңір тарихын дәріптеуге, еңбек адамын ұлықтауға және ұлттық құндылықтарды насихаттауға бағытталған маңызды рухани бастама ретінде есте қалды.
Материал «Мойынқұм ауданы әкімдігінің ішкі саясат бөлімі» КММ тапсырысы бойынша әзірленді.
