1 қаңтар күні Жамбыл облысының әкімі Ербол Қарашөкеев Тараз қаласындағы «Қарасу» (5) шағын ауданындағы шатыры өртенген №15 көпқабатты үйді аралап, тұрғындарының жағдайымен танысты.
– Өрттің шығу ошағын, себебін және шығын көлемін анықтау үшін арнайы комиссия құрылды. Тұрғын үйге нысаналы төтенше жағдай жарияланды. Әр пәтер бойынша келтірілген шығын есептеліп, заң талаптарына сәйкес қалпына келтіру жұмыстары жүргізіледі. Зардап шеккен тұрғындарға қажетті көмек көрсетіледі, – деді Ербол Қарашөкеев.
Қазіргі таңда мердігерлер шатыр жабындыларын алып, қалпына келтіру жұмыстарын бастап кетті. Пәтерлерді жөндеу тиісті комиссияның нақтылау, анықтау шараларынан кейін жүзеге асады.
Аймақ басшысы зерделеу коммисияның жұмысына тұрғындарды да тарту қажеттігін баса айтып, қала басшылығына нақты тапсырмалар жүктеді. Сондай-ақ, тұрғындарды сабырлық танытуға, сақтық шараларын қатаң сақтауға шақырды.
Еске сала кетейік, 2025 жылғы 31 желтоқсанда сағат 22:18-де аталған тұрғын үйдің балконынан өрт шығып, жалын шатырға тараған.
Төтенше жағдайлар департаментінің күшімен 100 адам, оның ішінде 30 бала эвакуацияланды. Сағат 00:13-те өрт толық сөндірілді. Зардап шеккендер жоқ.
Оқиға орнына 62 адам және 22 техника жұмылдырылды.
Көпқабатты тұрғын үйдің бірқатар тұрғындары қонақүйге орналастырылды.
Облыс әкімі Ербол Қарашөкеевтің тапсырмасына сәйкес оқиға орнында облыс әкімінің орынбасары Алтай Әлі мен Тараз қаласының әкімі Бақытжан Орынбеков жұмыс жүргізуде.
ҚР Премьер-министрінің тапсырмасына сәйкес Жамбыл облысының әкімі Ербол Қарашөкеев сауда нысандарын аралап, әлеуметтік маңызы бар азық-түлік тауарларының (ӘМАТ) бағасына мониторинг жүргізді.
Өңір басшысы Тараз қаласындағы «Корзинка» супермаркетін, «Нүрилә» дүкенін және әлеуметтік дүкенді аралап, негізгі азық-түлік өнімдерінің бағасын зерделеді.
– Мереке күндері азық-түлік бағасын негізсіз көтеруге жол берілмеуі тиіс. Баға қатаң бақылауда болуы қажет, – деді Ербол Қарашөкеев.
Жамбыл облысында азық-түлік бағасының негізсіз өсуіне жол бермеу мақсатында жүйелі шаралар қабылдануда. Атап айтқанда, өңірлік тұрақтандыру қорындағы өнімдер нарықтық бағадан төмен бағамен тауарлық интервенциялар тетігі арқылы ірі сауда желілері мен әлеуметтік дүкендерге жеткізілуде. Бұл өз кезегінде сауда субъектілері арасында бәсекелестікті арттырып, бағаның шарықтауына жол бермейді.
Бүгінде интервенция аясында 326 тонна картоп, 19,3 тонна қырыққабат, 30 тонна сәбіз, 89,5 тонна қант, 36,3 мың литр күнбағыс майы, 89,6 мың дана тауық жұмыртқасы, 1 тонна тұз және 500 килограмм күріш сауда орындарының сөрелеріне шығарылды.
Қазіргі таңда Тараз қаласында 16 әлеуметтік дүкен жұмыс істейді, қосымша тағы 3 әлеуметтік дүкен ашу жоспарлануда. Бұл дүкендерде жергілікті тауар өндірушілер мен тұрақтандыру қорының өнімдері нарықтағыдан төмен бағамен ұсынылады. Нәтижесінде әлеуметтік дүкендер қала тұрғындарының 11 пайызын, оның ішінде аз қамтылған отбасылардың 100 пайызын қамтып отыр.
2025 жылдың желтоқсан айынан бастап облыс орталығында 5 алаң белгіленіп, ауыл шаруашылығы өнімдерінің жәрмеңкелері күн сайын өткізілуде. Сонымен қатар отандық өндірушілерді қолдау мақсатында «Фиркан», «Көтерме саудагер», «Даниал Даму», «Арзан Сити» супермаркеттер желілерінде «Береке Fest» акциясы ұйымдастырылуда.
2025 жылдың басынан бері тауар өндірушілер мен көтерме жеткізушілер, сондай-ақ бөлшек сауда субъектілері арасындағы артық делдалдарды жою бағытында жүргізілген жұмыстар нәтижесінде ӘМАТ өнімдеріне 15 пайыздан жоғары сауда үстемесін қолдану бойынша 117 құқықбұзушылық фактісі анықталды. Нәтижесінде 85 кәсіпкерге жалпы сомасы 933 850 теңге көлемінде айыппұл салынды, қалғандарына ескерту берілді.
Тұрақтандыру қорында азық-түліктің 13 түрі бойынша жеткілікті қор қалыптастырылған.
