«Үлгілі ауылға – үлгілі алаң» жобасы аясында салынған бұл нысан ауылдың әлеуметтік инфрақұрылымын жақсартып, жас ұрпақтың бос уақытын тиімді өткізуге мүмкіндік бермек.
Аудандық ардагерлер кеңесінің төрағасы ауылдың дамуы мен жаңа жобаның маңыздылығы туралы пікірімен бөлісті:
«Бұл — біздің ауыл үшін үлкен қуаныш. Жастарға, балаларға жасалған осындай қамқорлық — болашаққа салынған инвестиция. Біз бұрын мұндай алаңды армандайтынбыз, ал қазір оны өз көзімізбен көріп отырмыз», — деді ардагерлер кеңесінің төрағасы.
Оның айтуынша, ауылдың көркейуі, инфрақұрылымның жаңаруы — тұрғындардың ортақ жауапкершілігі мен бірлігінің нәтижесі.
«Бұл тек ойын алаңы емес. Бұл — ұрпаққа деген құрмет, отбасы құндылығын, тәрбие мен тәрбиелік ортаны нығайтуға бағытталған маңызды еңбек. Балалар қауіпсіз жерде ойнап, ата-аналар алаңсыз бола алатындай жағдай жасалды. Бұл — құптарлық іс», — деп атап өтті ол.
Ардагерлер кеңесі өкілі сондай-ақ ауыл тұрғындарының ынтымақ бірлігін ерекше атап өтті.
«Осындай ортақ істер адамдарды жақындастырады. Біз ауыл қарқынмен дамып келе жатқанын көріп отырмыз. Елдіктің белгісі — сөзде емес, істің нәтижесінде», — деді ол.
Сөз соңында ол жобаға қолдау көрсеткен барлық ұйымдарға, бастамашыларға, ауыл азаматтарына ризашылығын білдірді:
«Осындай игі істер жалғаса берсін. Ауыл — біздің өткеніміз, бүгініміз және болашақ аманаты. Біз оны сақтауымыз керек», — деді ардагер.
