Бұл нысан — «Асқақ рух – Еркін ел» қоғамдық бірлестігінің бастамасымен және Жамбыл облысы әкімінің қолдауымен жүзеге асқан «Үлгілі ауылға – үлгілі алаң!» әлеуметтік жобасының нәтижесі.
Үлгілі ауылында 3 мыңнан астам тұрғын бар және бұл алаң балалардың бос уақытын қауіпсіз әрі пайдалы өткізуге арналған алғашқы арнайы кеңістік болып отыр. Жоба «Жамбыл облысы Байзақ ауданы Үлгілі ауылы тұрғындарының азаматтық бастамаларын қолдау» бағыты аясында іске асырылды.
Ашылу рәсіміне Байзақ ауданының әкімі, «Жамбыл облысы Азаматтық Альянсы» ЗТБ басқарма төрағасы, ауданның зиялы қауым өкілдері, Ардагерлер кеңесі, Аналар алқасы, аудандық мәслихат депутаттары, белсенді жастар мен ауыл тұрғындары қатысты.
Салтанатты рәсімде алғашқы сөз Байзақ ауданының әкімі Олжас Баққараевқа берілді. Ол өз сөзінде ауыл тұрғындарының ортақ іске белсенді қатысып, бірлескен күш-жігердің нақты нәтижеге айналғанын атап өтті:
«Қазақта ‘Қуанса — бала қуансын’ деген жақсы сөз бар. Бүгінгі балалар — ертеңгі елдің азаматы. Сондықтан бұл алаң — жас буынға жасалған маңызды әлеуметтік қолдау», — деді ол.
Ал облыс әкімінің кеңесшісі Исламбек Дастан жоба идеясынан бастап жүзеге асуына дейінгі процесті баяндап, оның тұрғындардың өзара ынтымақ пен жауапкершілік арқылы жүзеге асқанын жеткізді:
«Бұл жоба — азаматтық белсенділіктің жарқын үлгісі. Біз жабдықтарды 4,5 млн теңгеге алып, орнату жұмысын ауыл тұрғындарына сеніп тапсырдық. Нәтижесінде — өз қолымен салынған, өзіне тиесілі алаң пайда болды», — деді ол.
Ойын алаңы заманауи талаптарға сай жабдықталған: сырғанақтар, әткеншектер, ойын кешендері, құмсалғыш, карусельдер және сертификатталған қауіпсіз жабын төселген. Аумағы толық қоршалып, демалыс орындары орнатылған.
Алаңға алғашқы болып кірген қонақтар мен тұрғындарды ауылдық аналар кеңесінің төрайымы Жанат Әлібекова бастаған ақжаулықты аналар шашу шашып қарсы алды. Бұл дәстүрлі рәсім шараға ерекше жылы атмосфера сыйлады.
Ашылу барысында ауыл ақсақалдары мен тұрғындары жобаға қолдау білдірген барлық тарапқа алғыс айтып, нысанды күтіп ұстау мен жауапкершілік туралы ой бөлісті.
Алаң ресми түрде ауыл әкімдігінің балансына тапсырылды. Енді нысанның қауіпсіздігі мен тұрақты күтімі жергілікті атқарушы органның бақылауында болады.
Мемлекет басшысы балалардың әл-ауқаты мен дамуына ерекше назар аударып келеді. Бұл жоба — сол бағыттағы бастамалардың ауыл деңгейіндегі нақты көрінісі.
Грант операторы: «Азаматтық бастамаларды қолдау орталығы» КЕАҚ
Ұйымдастырушысы: «Асқақ рух – Еркін ел» ҚБ
