Өз сөзінде аймақ басшысы қатысушыларды келе жатқан Республика күнімен құттықтап, ізгі тілегін арнады.
Сонымен қатар ел Президентінің Қазақстан халқы Ассамблеясының XXXIV сессиясында берген тапсырмаларын орындау мақсатында өңірде қоғамдық келісім мен жалпыұлттық бірлікті нығайтуға бағытталған маңызды бастамалар жүзеге асырылып жатқанын атап өтті.
– Бүгінде облысымызда 87 этнос өкілі тату-тәтті өмір сүріп, аймақтың әлеуметтік-экономикалық дамуына сүбелі үлес қосып келеді. 78 этномәдени бірлестік халықтар достығы мен келісімнің алтын діңгегіне айналды.Биыл Ассамблеяның 30 жылдығы мен Жұмысшы мамандықтар жылы аясында қатарымыз еріктілермен толығуда. Кәсіпорындарда Еңбеккерлер Ассамблеялары құрылып жатыр. Олар еңбек ұжымдарында Қазақстан халқы Ассамблеясының өкілдері ретінде қызмет атқарып, ерікті бастамаларды жүзеге асыратын болады.Ал Қордай ауданында бой көтеретін жаңа Достық үйі этномәдени бірлестіктердің орталығы ғана емес, жастардың, зиялы қауымның және азаматтық қоғам өкілдерінің бас қосатын рухани алаңына айналмақ.Бұдан бөлек, келесі жылға жоспарланған «Достастық жәрмеңкесіне» дайындық аясында Тараз қаласындағы облыстық Достық үйін күрделі жөндеуден өткізу жоспарланып отыр.– Ассамблеяның жұмысы бұдан әрі де жаңа серпінмен жалғасып, ел ішіндегі татулық пен тұрақтылықты нығайтатын басты күш болып қала беретініне сенімдімін, – деді Ербол Қарашөкеев.
Жиында бірқатар этномәдени бірлестік өкілдері де құттықтау сөз сөйледі. Олардың қатарында облыстық ҚХА төрағасының орынбасары, өзбек этномәдени бірлестігінің мүшесі Гулам Умаров, ҚХА ғылыми-сараптамалық тобының төрағасы Махметғали Сарыбеков, татар және башқұрттар конгресі облыстық филиалының төрағасы Фарида Нақыш, сондай-ақ неміс этномәдени бірлестігінің төрағасы Александр Гибнер бар.
Кеңейтілген кеңес барысында өңірдегі этносаралық бірлік пен келісімді нығайтуға үлес қосқан бірқатар азамат құрметке бөленді. Оларға «Қазақстан халқы Ассамблеясына 30 жыл» мерекелік медалі, ҚХА-ның Алғысхаты, сондай-ақ облыс әкімінің «Облысқа сіңірген еңбегі үшін» белгісі, Құрмет грамотасы және Алғысхаты табыс етілді.
Шара соңы естелік суретке түсумен аяқталды.
Жамбыл облысының әкімдігі
