Көрменің басты мақсаты — ұйғыр халқының тарихи, рухани, мәдени және ұлттық құндылықтарын кеңінен таныту, ұрпақ санасына ата-бабадан қалған мұраның маңызын сіңіру, сондай-ақ Қазақстандағы қоғамдық келісім мен ұлттық бірліктің үлгісін насихаттау.
Аталған көрме Қазақстан Республикасы Президентінің 2025 жылғы 24 сәуірдегі Қазақстан халқы Ассамблеясының XXXIV сессиясында берген тапсырмаларына сәйкес әзірленген «модельдік жол картасы» аясында жүзеге асуда. Бұл бастама түрлі этностардың бірегей мәдени мұрасын дәріптеуге бағытталған.
Салтанатты жиынды «Қоғамдық келісім» КММ басшысының орынбасары Сәуле Құрманқұлова ашып, өз сөзінде этномәдени мұраны сақтау мен ұрпаққа жеткізудің маңызын атап өтті. Ұйғыр бірлестігінің Ақсақалдар кеңесінің төрағасы Тұрсынмамед Қасымов пен Аналар кеңесінің төрайымы Мухабат Алеханова да көрермендерге ізгі тілектерін арнады.
Іс-шара барысында ұйғыр этносының ұлттық ән-билері орындалып, көрменің кішкентай қатысушысы Марлен Берденғали «Бұл – менің елім!» әнін орындап, көпшіліктің ыстық ықыласына бөленді. Сондай-ақ келушілерге ұйғырдың ұлттық тағамдары ұсынылып, сәндік-қолданбалы өнер бұйымдары, ұлттық киімдер мен тарихи жәдігерлер көпшіліктің қызығушылығын тудырды.
Жиын соңында Сәуле Құрманқұлова көрменің мазмұнын байытуға үлес қосқан белсенділерді марапаттап, жиналғандарға арнайы экскурсия жүргізді.
Мұндай іс-шаралар еліміздегі этностар арасындағы мәдени байланысты нығайтып, Қазақстан халқының біртұтас рухани кеңістігін қалыптастыруға, жас ұрпақты тарихи мұраны қастерлеуге баулуға үлкен үлес қосатыны сөзсіз.
