«Жамбыл металлоконструкция зауыты – Имсталькон» ЖШС-де Елбасының «Қазақстанның үшінші жаңғыруы: жаһандық бәсекеге қабілеттілік» атты Жолдауы талқыланды.
Шараға партия облыстық мәслихатындағы депутаттық фракциясының мүшесі, облыстық онкологиялық диспансерінің бас дәрігері Абай Нұржанов пен зауыт ұжымы қатысты. Жиында ашып жүргізген зауыттың бастауыш партия ұйымының төрайымы Айнұр Рахманқұлова Жолдауда атап көрсетілген 5 басым бағытқа кеңінен тоқталды. Береке-бірлік пен саяси тұрақтылықты одан әрі нығайтып, еліміздің іргесін бекіте түсуі қажеттігін алға тартты. Мұнан соң сөз тізгіндеген облыстық мәслихат депутаты Абай Нұржанов мемлекеттік билік тармақтарының арасында өкілеттіктерді қайта бөлу туралы Елбасы Үндеуі туралы түсіндірме жұмыстарын жүргізді. Жолдаудың 4 бағытына тереңірек тоқталып, 3 тілде білім беру жүйесі уақыт талабы екендігін атап өтті.
Сонымен қатар ол биылғы 1 шілдесінен бастап мемлекеттің, жұмыс берушілердің, азаматтардың ортақ жауапкершілігіне негізделген міндетті медициналық сақтандыру жүйесі енгізіле бастайтындығын мәлім етті. Медициналық сақтандыру жүйесіне қатысушыларға кең ауқымдағы медициналық қызметтер ұсынылатындығын айтты. Оған халықтың әлеуметтік әлсіз топтарының қатысуына мемлекеттік қолдау көрсетілетіндігін жеткізді.
Сондай-ақ Жолдауда заңнамалық тұрғыдан барлық дәрі-дәрмектің бағасын реттеуді енгізу қажеттігі атап көрсетілгенін сөз етті.
Жиын барысында зауыт жұмысшылары Жолдаудан туындайтын мақсат-міндеттерді бірауыздан қолдайтындықтарын білдірді.
Turaninfo.kz
