85 жылдық тарихында бұл ұйым адам өмірін қорғау, қиын жағдайдағы жандарға көмек көрсету, мейірімділік пен өзара түсіністікке негізделген қоғам қалыптастыру жолында өлшеусіз еңбек етіп келеді. Жамбыл облыстық филиалы да осы миссияны абыроймен жалғастырып, аймақ тұрғындарына жан-жақты қолдау көрсетуде. Филиалдың басшысы Қырғызбаева Сандуғаш Дастанқызының жетекшілігімен ұйым түрлі әлеуметтік және гуманитарлық бағыттағы жобаларды табысты іске асырып келеді.
Ұйым өз жұмысында халықаралық Қызыл Крест және Қызыл Ай қозғалысының негіз қалаушы қағидаттарын басшылыққа алады. Қоғамда әлеуметтік теңдік пен адам абыройына құрметті қалыптастыру – басты мақсаты. Осы мақсат аясында филиал соғыс жылдары концлагерьлерде немесе арнайы қоныстарда болған азаматтар туралы тарихи деректерді іздестіру, сондай-ақ көші-қон мен табиғи апаттар салдарынан отбасынан ажырап қалған азаматтарға көмектесу жұмыстарын атқарды. Бұл бастамалар тек гуманитарлық қана емес, тарихи әділеттілікті қалпына келтіру бағытындағы маңызды қадамдар болып саналады.
Қоғамның маңызды бағыттарының бірі – алғашқы медициналық көмек көрсету дағдыларын үйрету. Жамбыл облыстық филиалы тұрғындарды төтенше жағдайлар кезінде әрекет етуге даярлау, шұғыл жағдайларда алғашқы жәрдем көрсету машықтарын дамыту мақсатында тренингтер мен оқыту сабақтарын тұрақты түрде өткізіп отырады. Сонымен қатар, ұйым түрлі аурулардың алдын алу мен салауатты өмір салтын насихаттауға арналған мемлекеттік және қоғамдық бағдарламаларға да белсенді түрде қатысады.
Филиал тарапынан әлеуметтік жағынан осал санаттарға – зейнеткерлерге, мүгедектерге, Ұлы Отан соғысы және еңбек ардагерлеріне, көп балалы отбасыларға, жалғызбасты аналар мен тұрмысы төмен азаматтарға тұрақты түрде көмек көрсетіліп келеді. Осы кезге дейін 20 мыңнан астам адамға 35 миллион теңгеден астам сомаға азық-түлік, киім-кешек және тұрмыстық тауарлар үлестірілді. Бұл – нақты қажеттілікке бағытталған нақты көмек.
Ұйым балаларға ерекше көңіл бөледі. Жетім және ата-ананың қамқорлығынсыз қалған балаларға, ақыл-ойы кем дамыған интернаттардағы тәрбиеленушілерге жыл сайын арнайы қайырымдылық шаралар ұйымдастырылып, кеңсе тауарлары, ойыншықтар, киім-кешек пен тәттілер тарту етіледі. Бұл шаралар балалардың қуанышын арттырып, қоғам назарынан тыс қалмауына ықпал етеді.
Жамбыл облыстық Қызыл Ай филиалы — бұл қиын сәтте үміт сыйлайтын, қоғамдағы ең әлсіз жандарға қолдау көрсететін сенімді арқа. Ұйым өз қызметінде ұлтқа, дінге, жынысқа немесе әлеуметтік мәртебеге бөлмей, әрбір адамның қадір-қасиетіне құрметпен қарап, әділетті, мейірімді қоғам құруға шын ықыласпен үлес қосып келеді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
