«Баласағұн» ОКЗ-да Жамбыл облыстық филармониясының ұйымдастыруымен қазақ вальсінің королі, күллі қазақ даласының ән қоржынына әуезді әндерінен маржан тізген Шәмші Қалдаяқовтың шығармашылығына арналған «Шәмшінің шарықтаған әндері» атты кеш болып өтті. Шәмшінің есімін ұлықтап, әндерін кеңінен насихаттап, ұрпаққа қалдырған ән мұрасына құрметпен қарауға бағытталған игілікті шара шымылдығы Шәмші әндерінің поппуриімен ашылды. ҚР еңбек сіңірген қайраткері Мұхтар Рахманқұловтің жетекшілігіндегі қазақ ұлт-аспаптар оркестрі сүйемелдуімен ҚР мәдениет қайраткер Рәзия Мәдіханова «Қайықта» әнін шырқаса, талантты әнші Жанатбек Кәдіров «Арқалықтың ақ таңы» әнін, Әсел Уашева «Айналдым ақ маңдайлым» әнін орындап халықтың ыстық ықыласына бөленді. Кеш барысында ақын, драматург Исраил Сапарбайдың «Сыған серенадасы» атты шоқтығы биік музыкалық драмасын Облыстық қазақ драма театрының әртістері сахналап Ұлы композитордың ғұмырынан сыр шертті. Шәмшінің ең танымал «Ана туралы жыр», «Кешікпей келем деп ең», «Ақ бантик» атты ұмытылмас әндері залдағы көрермендермен бірге шырқалды. Концерт барысында композитордың «Дүнген қызы» әнімен дүйім жұртшылыққа танымал болған Ғани Мәтебаев, облысқа белгілі «Тараз триосы», Торғын Орынбаева, Мадина Сағынбекова, Оңал Азаматова, Маралбек Бабақұлов, Анна Вундер, Балдат Бейсеқожа, Гүлшат Тинасилова сынды талантты әншілер Шәмші әндеріне шөлеркеп келген халыққа әннен маржан төкті. Сахна төрінде орналасқан Led-экраннан Ұлы композитордың ғұмыры мен әндері хақында бейнесюжеттер көрсетілді. Қазақ вальсі королінің әндерін жанды дауыста шырқап концертке атсалысқан әншілер кеш соңында бүгінде еліміздің әнұраны болып әуелеп жүрген «Менің Қазақстаным» әнін бірге шырқады.
Арайлы Жақсылық
