Жамбыл облысының полиция департаменті (бұдан әрі-ПД) сотқа жауапкер Ш.-ның жүргізуші куәлігін жарамсыз деп тану туралы талап арызбен жүгінді.
2022 жылдың қазан айында Сыбайлас жемқорлыққа қарсы қызметпен жүргізілген тексеру барысында 36 тұлғаға, оның ішінде жауапкер Ш.-ға жалған анықтама негізінде, яғни теориялық білім мен тәжірибелік дағдыларын білуге арналған емтихандарды тапсырмай, «жоғалғанның орнына» белгісімен жүргізуші куәлігі (дубликат) берілгені анықталды.
«Жол жүрісі туралы» Заңның 73-б. сәйкес көлік құралдарын басқару құқығы жоғарыда аталған заңның 74-б. көрсетілген шарттар сақталған жағдайда емтихан тапсырған тұлғаларға беріледі.
Тексеру қорытындысы бойынша ПД-нің атына анықталған бұзушылықтарды жою туралы ұсыныс жолданған.
Сотта талап қоюшының өкілі талап арызды қолдап, талапты толығымен қанағаттандыруды сұрады.
Жауапкер сотқа келмеді, алайда өзінің жазбаша арызында талап арызды мойындап, істі оның қатысуынсыз қарауды сұрады.
Сот шешімімен талап қоюшының талаптары толық көлемде қанағаттандырылып, жауапкер Ш.-ның жүргізуші куәлігі жарамсыз деп танылды.
Шешім заңды күшіне енген жоқ.
Жамбыл аудандық сотының баспасөз қызметі
