Атаулы әлеуметтік көмек тағайындау мен мүгедектік тобын қайта куәландыру мерзімдері ұзартылды, Электрондық үкіметтің мобильді қосымшасында келтірілген залалды өтеуге өтініш беру функционалы іске асырылды. Жергілікті атқарушы органдар барлық қажетті көмекті көрсетуде.
ТЖ режимі жарияланған қалалар мен аудандарда тұратын 5 мың отбасына атаулы әлеуметтік көмек мемлекеттік органдарға жүгінуді болдырмастан автоматты түрде тағайындалды.
Сондай-ақ, ТЖ режимінің қолданылу кезеңінде балаларды қоса алғанда, 4 мыңға жуық адамға мүгедектікті қайта куәландыру мерзімдері автоматты түрде ұзартылды. Мүгедектігі бойынша жәрдемақы төлеу бұрын белгіленген топ бойынша жүзеге асырылады.
Сәуір айындағы зейнетақылар мен жәрдемақылар оларды алушылардың екінші деңгейдегі банктердегі шоттарына және «Қазпошта» АҚ-ға кідіріссіз және толық көлемде аударылды.
Жергілікті атқарушы органдар өз қаражаты есебінен су тасқынынан зардап шеккен 2,3 мың отбасына 555,4 млн теңгеге әлеуметтік көмек көрсетті.
Су басқан аймақтардан 96 мүгедектігі бар адам эвакуацияланды. Жергілікті жерлерде оларға барлық қажетті көмек көрсетілді.
Республика бойынша қарттар мен мүгедектігі бар азаматтарға арнаулы әлеуметтік қызмет көрсететін барлық 118 орталық штаттық режимде жұмыс істеуде.
Кәсіподақтар федерациясы әлеуметтік осал санаттарға жататын азаматтарды сауықтыру үшін республиканың 7 санаторийінде 164 орын бөлді.
Электрондық үкіметтің мобильді қосымшасында су тасқыны салдарынан келтірілген залалды өтеуге өтініш беру функционалы іске асырылды. Қосымшаны апробациялау Ақмола облысында басталады.
Еңбек және әлеуметтік қорғау комитетінің баспасөз қызметі
