«Тілін білмеген ‑ тегін білмейді», ‑ деген атам қазақ. Бүгінгідей ел болып еңсе көтерген тұста ана тіліміздің қадірі мен қасиетін арттырып, мемлекеттік тілдің мәртебесін көтеру маңызды мәселе болып тұр.
Қазақ тілі ‑ тәуелсіз жұртымыздың мемлекеттік тілі және ол барлық отандастарымызды ортақ мақсатқа топтастыратын ұлттық бірліктің басты факторы болып табылады. Қазақ тілі тәуелсіздіктің арқасында мемлекеттік тіл мәртебесін алып, мемлекеттік тілге деген талап күшейтілді.
Бүгінде мемлекеттік тілді дамытып, оның қолданыс аясын кеңейту мақсатында мемлекет тарапынан атқарылып жатқан шаралар аз емес.
Мемлекеттік тіл- қазақ тілі арқылы іске асады. Ал қазақ тілі – қазақ ұлтының уақыт ағымынан алынған адамдардың өмірлік тәжірибесін, оның наным-сенімін, өмір салтын, шығармашылық қуатын көрсететін аса бай тіл.
Тіл ‑ ұлттың жаны, рухы, оның бет-бейнесі, өткені мен бүгіні және болашағы, ұрпақ тәрбиелеуге ықпал ететін құрал. Мемлекеттік тілде, яғни қазақ тілінде іс жүргізудің сапасы артуда.
Қазақстан Президенті Қасым-Жомарт Тоқаев халыққа арнаған жолдауында ел азаматтарын қазақ тілін ұлтаралық қатынас тіліне айналдыру үшін жұмыла жұмыс жүргізуге шақырды. Яғни, президент: «Еліміздегі этникалық топтардың тілі мен мәдениетін дамытуға жағдай жасай береміз. Қазақ тілінің мемлекеттік тіл ретіндегі рөлі күшейіп, ұлтаралық қатынас тіліне айналатын кезеңі келді деп есептеймін. Бірақ, мұндай дәрежеге жету үшін бәріміз даңғаза жасамай, жұмыла жұмыс жүргізуіміз керек»-деді.
Тәуелсіздіктің басты тірегінің бірі ‑ мемлекеттік тіл. 2050 жылға дейінгі кезеңге арналған еліміздің даму стратегиясында да мемлекеттік тілге ерекше назар аударылған.
Ұлттың рухани жаңғыруында тілдік сананың жаңғыруы айырықша десек, қазақтың тілі мен ұлттық рухы, рухани жаңғырудың негізгі өзегіне айналған, әлемдік өркениетте өз орны бар мәңгілік елдің жарқын болашағы үшін жұмыла еңбек ету ел алдындағы басты парызымыз.
Сондықтан, тіл тағдыры-ел тағдыры екенін еш уақытта ұмытпайық.
Жамбыл облысының
қылмыстық істер жөніндегі
мамандандырылған ауданаралық
соты әкімшісінің бас маман-
сот отырысы хатшысы: Ж.Айтбаева
