Ақынның 178 жылдығына арналған шараға Жамбыл облысының әкімі Ербол Қарашөкеев, облыстық, қалалық ардагерлер, қоғамдық Кеңестің төрағалары, мәслихат депутаттары, зиялы қауым және қоғам белсенділері, ЖОО басшылары және тағы басқалар қатысты.
Ербол Қарашөкеев атаулы датаға орай өзінің әлеуметтік желідегі ресми парақшасында ой бөлісті.
Бүгін Жыр алыбы — Жамбыл Жабаевтың туған күніне орай ескерткішіне гүл шоқтарын қойып, рухына тағзым еттік.
ХХ-ғасырдың Гомері атанған тұлғаның өнегелі өмірі мен өнері – туған халқын сүюдің, оған қалтқысыз қызмет етудің озық үлгісін айшықтайды.
Елімізде ақын атымен аталатын екі ғана облыс бар десек, оның бірі – Жамбыл облысы. Қазақстанда ғана емес, жалпы әлемде де адам атымен аталатын облыс, қалалар санаулы.
Ғасыр жасаған абыздың есімін еншілеген өңіріміздің әлеуметтік-экономикалық дамуымен қатар, рухани-мәдени саласында да оң өзгерістер, атқарылып жатқан ауқымды шаруалар аз емес. Аймақта тұлғаға деген құрмет те ерекше.
Айталық, облыста ақын есімі берілген 1 аудан, 4 ауылдық округ, 4 елдімекен, 1 даңғыл мен 87 көше, 9 мектеп және 2 кітапхана, 1 Жамбылтану орталығы бар. Сондай-ақ, өңірде тұлғаның құрметіне барлығы 8 ескерткіш орнатылған.
Жақын күндері өңірде «Жамбыл менің жәй атым, Халық – менің шын атым» атты дәстүрлі республикалық ақындар айтысы өтеді. Сондай-ақ, Айтыскер ақындар, жыршы-термешілер орталығы ашылады.
Дала данагөйінің дара жолы елдік мүддеге қызмет етіп жүрген әрбір адамға үлгі-өнеге. Жыр алыбының есімін кейінгі ұрпаққа лайықты түрде танытып, оның рухани өміршең мұрасын кеңінен насихаттау — бүгінгі біздің мерейлі міндетіміз, — деді өңір басшысы.
