Жамбыл облысының қылмыстық істер жөніндегі мамандандырылған ауданаралық сотында, Қылмыстық кодекстің (әрі қарай ҚК) 297 бабының 3 бөлігінің 3) тармағы (аса iрi мөлшердегі есірткі заттарды өткізу мақсатында заңсыз сақтау, тасымалдау) бойынша айыпталушы С.У.-ға қатысты қылмыстық іс қаралды.
Сотпен не анықталды:
Наркологиялық есепте 2016 жылдан бастап есірткіге тәуелді адам бола тұра, С.У. Шымкент қаласына бара жатып, «Toyota Camry» маркалы автокөлік құралының рулінің астында өткізу мақсатынсыз аса ірі көлемде «героин» есірткі құралын заңсыз сақтап, тасымалдаған.
Жамбыл облысы полиция Департаментінің есірткі қылмысына қарсы іс-қимыл басқармасымен және жол полиция қызметкерлерінің қатысуымен С.У.-дың басқаруындағы аталған көлік Тараз қаласындағы Кенесары хан даңғылында аса ірі көлемде есірткі затын заңсыз сақтау күдігімен тоқтатылған. Автокөлік құралын тінту барысында, С.У. рульдің астында заңсыз сақталған салмағы 37,61 гр «героин» есірткі затын көрсетіп, өз еркімен берген.
Тараптардың позициясы:
Прокурор сотталушы С.У.-ге 11 жыл 6 айға бас бостандығынан айыру түріндегі жаза тағайындауды сұрады.
Сотталушы С.У. кінәсін ішінара мойындады.
Дәлелдемелер бойынша:
Жасаған іс-әрекеті тергеп-тексеру амалдары жүргізілу барысында толтырылған процессуалдық құжаттармен, сараптамалардың қорытындыларымен, куәлердің жауаптарымен және басты сот талқылауында зерделенген қылмыстық істің процессуалдық өзге де материалдарымен дәлелденді.
Сот шешімі:
Сот С.У.-дың өткізу мақсатынсыз есірткі затын аса ірі көлемде заңсыз сақтау мен тасымалдаудағы кінәсінің дәлелденгені туралы тұжырымға келіп және оның әрекетін ҚК 296-бабының 4-бөілігі бойынша сараланды.
Қылмыстық жауаптылық пен жазасын жеңілдететін мән-жайлар ретінде, сот оның шын жүректен өкінуін, жас балаларының болуын таныды. Қылмыстық жауаптылық пен жазасын ауырлататын мән-жайлар ретінде сотқылмыстардың қауіпті қайталануын таныды.
Сот үкімімен ҚК-нің 296-бабының 4-бөлігі бойынша кінәлі деп танылып, С.У.-ға қылмыстық-атқару жүйесінің қауіпсіздігі барынша жоғары мекемесінде жазасын өтей отырып, 6 жыл 6 айға бас бостандығынан айыру жазасы тағайындалды.
Үкім заңды күшіне енген жоқ.
Айгүл Ержігіт
