Жамбыл облысының қылмыстық істер жөніндегі мамандандырылған ауданаралық сотымен Қылмыстық кодекстің (әрі қарай ҚК) 297-бабының 3-бөлігінің 1),3)-тармақтары бойынша яғни, адамдар тобының алдын-ала сөз байласуымен аса ірі мөлшердегі психотроптық заттарды өткізу мақсатында заңсыз сақтау, тасымалдау бойыншаайыпталушы С.Қ.-ға қатысты қылмыстық іс қаралды.
Сотпен не анықталды:
Сотталушы С.Қ.-ның «Telegram» парақшасына «Джим Кери» атауымен тіркелген, cотқа дейінгі тергеп-тексерумен анықталмаған адам хабарласып, психотроптық заттарды алдын ала тығылып тұрған жерінен алып кетіп, қаланың аумағындағы жерлерде көрінбейтіндей етіп қайта тығып қойып, «Снеп Маркап» арнайы қосымша арқылы мекенжайдын суретін жіберіп, сыйақы ретінде аптасына 100 000 теңге көлемінде ақша төлейтіні жөнінде ұсыныс жасаған, өз кезегінде, сотталушы С.Қ. қосымша табыс табу мақсатында аталған ұсынысқа келісімін берген.
Ары қарай, 2023 жылдың 18 ақпанында, сотталушы С.Қ. басқа адаммен «Telegram» әлеуметтік желісі арқылы байланысып, психотроптық заттар сақтауда тұрған жерін сұрап алып, соңғы жіберген мекен—жайы бойынша қоғамдық көлікпен барып, жол бойындағы арық жанында жасырылып тұрған есірткі, психотроптық, сол тектестер мен прекурсорлар қатарына жатпайтын заттарын алып кетіп, Тараз қаласы аумағындағы мекен-жайлардың біріне тығып кеткен.
Сол күні, сотталушы С.Қ. қылмыстық ойын жүзеге асыру мақсатында, басында тығып кеткен аса ірі мөлшердегі психотроптық заттарды алып кету үшін қайта келіп, психотроптық заттарын сөмкесіне салып, жол бойына шығып, келе жатқан уақытында Тараз қаласы полиция басқармасының есірткіге қарсы іс-қимыл бөлімінің қызметкерлерімен ұсталған.
Жеке тінту барысында сотталушы С.Қ.-ның сөмкесі ішінен 15-дана қызыл түсті изолентаға оралған, 9-данасыаса ірі мөлшерде өткізу мақсатында заңсыз сақтап, тасымалдаған, жалпы салмағы 6,83 грамм «3,4-метилендиоксиметамфетамин» (МДМА) психотроптық заттары, ал 6-данасы есірткі, психотроптық, сол тектестер мен прекурсорлар қатарына жатпайтын заттары табылып алынған.
Тараптардың позициясы:
Прокурор сотталушы С.Қ.-ға 10 жыл бас бостандығынан айыру түріндегі жаза тағайындауды сұрады.
Сот отырысында сотталушы С.Қ. өзінің кінәсін толық мойындап, төмен жаза тағайындауды сұрады.
Дәлелдемелер бойынша:
Кінә іс бойынша жиналған дәлелдемелермен: жеке басына тінту жүргізу туралы хаттамасымен, заттай дәлелдемелермен, айғақтарды нақтылау және тексерулермен, сараптамалардың қорытындыларымен, сондай-ақ қылмыстық істің өзге де материалдарымен дәлелденді.
Сот шешімі:
Қылмыстық жауаптылық пен жазасын жеңілдететін мән-жайлар ретінде, сот оның өз кінәсін мойындауын, іс-әрекетіне шын ниетпен өкінуін, бұрын сотты болмағанын, отбасылық жағдайын, жастығын және тұрғылықты жері бойынша жақсы жағынан мінезделуін табады.
Ауырлататын мән-жайлар сотпен анықталған жоқ.
Сот үкімімен ҚК-нің 297-бабының 3-бөлігінің 1),3)-тармақтары бойынша С.Қ.-ға орташа қауіпсіздік қылмыстық-атқару жүйесі мекемесінде жазасын өтей отырып, 10 жылға бас бостандығынан айыру жазасы тағайындалды.
Үкім заңды күшіне енген жоқ.
