Чемпионаттың ашылуына өңірдің басшылығы, Ішкі саясат басқармасының, Ішкі істер департаментінің, Қорғаныс департаментінің, түрлі партиялардың, жастар ұйымдарының, Дене шынықтыру және спорт басқармасының өкілдері, азаматтық қорғау қызметінің ардагерлері, жұртшылық, бұқаралық ақпарат құралдарының өкілдері, сондай-ақ өрт сөндіруші-құтқарушылар қатысты. Салтанатты шарада еліміздің түрлі өңірлерінен 34 команда қатысты.
Жарыс жетекшісі Жамбыл облысы ТЖД Өрт сөндіру және авариялық-құтқару жұмыстары қызметінің бастығы азаматтық қорғау полковнигі Әлібек Әбсатов облыс әкіміне республикалық чемпионатты өткізуге дайын екендігі туралы баяндады.
Облыс әкімі Нұржан Нұржігітов жарысқа қатысушылар мен қонақтарды жылы қарсы алып, жазғы өрт-құтқару спортынан ерлер мен ІХ әйелдер арасында Қазақстан Республикасының ХХІХ чемпионатының ашылғанын хабарлады.
Қазақстан Республикасының Өрт сөндірушілер және құтқарушылар спорт федерациясының директоры Дәурен Данаев өзінің құттықтау сөзінде ұйымдастырушыларға алғысын білдіріп, жарыстың барлық қатысушыларына табыс тіледі. Іс-шара ТЖД гарнизонының талантты қызметкерлері мен жергілікті филармония әртістерінің өнерімен жалғасты.
Жарыс 19-22 шілде аралығында төрт күн бойы өтеді. Жарыс бағдарламасына 100 метрлік кедергілерден өту, шабуыл сатысымен оқу мұнарасына көтерілу, өрт эстафетасы және жауынгерлік қанат жаю кіреді.
