Ағымдағы эпидемиялық маусымда вирустың үш штаммы өзекті — A(H1N1), A(H3N2) және B, олар вакцинаның құрамына енгізілген, деп хабарлады ҚР ДСМ Санитариялық-эпидемиологиялық бақылау комитеті төрағасының орынбасары Марал Рахымжанова.
Қазақстанда ЖРВИ және тұмау ауруларын мониторингтеу жыл сайын 1 қазаннан 30 сәуірге дейін жүргізіледі. Ағымдағы эпидемиялық маусымның басынан бастап (2022 жылғы 1 қазаннан бастап) 1 027 000 ЖРВИ жағдайы тіркелді. Бұл ретте СЭБК басшысы орынбасарының айтуы бойынша республикадағы сырқаттанушылық өткен жылдың осындай кезеңіндегі деңгейде.
«Тұмаудың 865 зертханалық расталған жағдайы тіркелді, оның ішінде 14 жасқа дейінгі балалар арасында – 341. Қазақстанда тұмаудан басқа тұмауға ұқсас вирустар да таралуда. Басқа тұмауға ұқсас инфекцияларға 2292 сынама тексерілді, оның ішінде 341 сынамада (14,8%) оң нәтиже анықталды, оның ішінде риновирус – 124, РС вирус – 97, парагрипп – 35, коронавирус – 32, аденовирус – 32, бокавирус – 15, метапневмовирус – 6» — атап өтті Марал Рахымжанова.
Ағымдағы эпидемиялық маусымда тұмау және ЖРВИ бойынша санитариялық-профилактикалық, санитариялық-эпидемияға қарсы іс-шараларды жүргізу мақсатында 19 қыркүйекте Қазақстан Республикасының Бас мемлекеттік санитариялық дәрігерінің ағымдағы эпидемиялық маусымға тұмау және ЖРВИ бойынша санитариялық-профилактикалық, санитариялық-эпидемияға қарсы іс-шараларды жүргізу туралы қаулысына қол қойылды. Оған сәйкес медициналық ұйымдардың тұмауға қарсы иммундау науқанын өткізуге, тұмаумен және ЖРВИ-мен ауыратын науқастарды қабылдауға дайындығы, сондай-ақ зертханалардың тұмауға және басқа ЖРВИ-ге зертханалық зерттеулер жүргізуге дайындығы қамтамасыз етілді.
М.Рахымжанова аурудың алдын алудың ең тиімді әдісі – вакцинация деп атап өтті. Ағымдағы жылы бюджет қаражатына Ресейде шығарылған «ГРИППОЛ +» вакцинасының 2,3 млн. дозасы сатып алынды. Вакцина құрамында алдағы маусымдағы вирустарға қарсы штаммдар бар. Бұл жалпы республика халқының 12%-ын қамтуға мүмкіндік береді, ДДҰ ұсынған көрсеткіш – кемінде 10%.
Сонымен қатар, ол халықтың осал топтары: медицина қызметкерлері; медициналық ұйымдарда диспансерлік есепте тұрған балалар; жетім балалар мен ата-анасының қамқорлығынсыз қалған балаларға арналған білім беру ұйымдарының, балалар үйлерінің балалары; эпидемиологиялық көрсеткіштер бойынша мемлекеттік бюджет қаражаты есебінен егіледі деп толықтырды.
Қазан айының басынан бастап халыққа тұмауға қарсы вакцинация жүргізілуде. Республика бойынша тұмауға қарсы 2 136 575 адам немесе жалпы республика халқының 11,3%-ы егілді, оның ішінде: жергілікті бюджет қаражатынан – 2 054 220 адам (96,1%); жұмыс берушілер есебінен – 51 653 адам (2,4%); ақылы негізде – 30 702 адам (1,5%).
Комитет өкілінің ақпараты бойынша вакцинация алғандар арасында: 14 жасқа дейінгі балалар – 468 579 (22%), ересек адамдар – 1 667 772 адам (78%). Вакцинациядан кейінгі асқынулар тіркелген жоқ.
Спикер тұмау кенеттен басталып, температура күрт жоғарылайтынын еске салды. Дененің айқын интоксикациясы байқалады, қалтырау, адинамия, бұлшықеттің және бастың ауыруы, дененің сырқырауы, кеуде тұсы ауырып, құрғақ жөтел сияқты белгілері болады.
Аурудың алдын алу үшін мынадай профилактика шараларын сақтау ұсынылады: адамдар көп жиналатын орындарға, әсіресе жабық үй-жайларға баруды шектеу; бөлмелерді желдету, антисептикалық құралдарды пайдаланып, дезинфекциялық режимді күшейту; қолды өңдеу үшін антисептиктерді немесе дезинфекциялық сулықтарды пайдалану; науқас адамдармен байланысты шектеу, оларды оқшаулау; ауырғандардың 80%-ы балалар екенін ескере отырып, тұмау мен ЖРВИ белгілері пайда болған кезде балаларды үйде қалдырып, ұйымдастырылған ұжымдарға (мектепке дейінгі ұйымдарға, мектептерге) жібермеу керек; медициналық көмекке уақтылы жүгіну керек.
