Бүгін Мемлекет Басшысы Қ.Тоқаев кезекті Жолдауын халыққа жолдаған болатын. Жолдау туралы ҚР Ақпарат және қоғамдық даму министрі Асқар Омаров фэйсбук әлеуметтік желісіндегі парақшасына өз пікірін білдірді.
Бұл Жолдау қай тұрғыдан алсақ та, мәні зор месседждерге толы болды. Ең әуелі, Президенттің «Мен үшін мемлекет мүддесі бәрінен биік» деген сөзінен бастасақ, қандай сындарлы сәтте де Тәуелсіз елдің жауапкершілігін өз мойныман көтере білетін Мемлекет басшысы Егемен елдің тағдыры әрбір азаматқа тікелей қатысты екенін шегелеп көрсетті деп ойлаймын. Бұны мен Парламенттің залында отырып сезіндім.
Министр Президентін өз Жолдауында жаңа экономикалық саясат, нақты секторды дамыту, Қазақстанның транзиттік қуатын арттыру, ауыл шаруашылығын өркендету, ел болшағына арналған стратегиялық инвестиция, білім беру саласын жетілдіру, отбасыларға көмек, мемлекеттік басқару ісін қайта жаңғырту, заң және тәртіп бағытындағы түбегейлі өзгерістерді, ең бастысы, Жаңа Қазақстанның өркен жаюына қажетті байыпты бағдарламаны баяндады деп атап кетті.
Келесі атап өтетін мәселе, «Кәсібилік пен еңбекқорлық қоғамымызда ең жоғары орында тұруы керек. Елімізде еңбекқор адам, кәсіби маман ең сыйлы адам болуға тиіс», — деді Президент. Бұл Мемлекет басшысының ел дамуының ең басты факторының бірі «Еңбек адамы» идеясынан бастау алады. Яғни, нағыз self-made man, қоғамға бойдағы күш-қайратын сарқып беретін, өзіне сенетін, кәсіби профессионалдарды дәріптеу біздің басты бағытымыз болмақ. Бұл Жаңа да Әділетті Қазақстанның қалпын көрсететін құндылықтың бірі деп ойлаймын.
Мемлекет басшысы Жолдауда жастарға бірнеше рет тоқталды. Балаң буынға нақты қолдаудың бір көрінісі келер жылдан бастап 100 мың жасқа жұмыс беру деп ойлаймын. Ұландарға жеңілдетілген несие ұсыну олардың стартап бастамаларын жүзеге асыруға сеп болады деп ойлаймын. Президент тапсырмасына орай, өңірдерде жастармен кездесуде небір талантты ұландарды көріп жүрміз, олардың инновациялық жобаларына енді мемлекет тарапынан үлкен қамқорлық жасалуы қуантады.
Президенттің қоғамдық кеңестердің, бірлестіктердің қызметін жетілдіруге қатысты тапсырмасы да біздің назарда болады. Себебі азаматтық қоғамның бастауы өзін-өзі басқаруда жатыр. Ал мемлекеттің модернизациялануы әр адамның жеке белсенділігіне тікелей тәуелді. Президент айқын көрсеткендей, мемлекетшілдік сана, мемлекет мүддесін өзінен жоғары қою қоғамның әр қатпарындағы азаматтардың бойынан табылуға тиіс.
Қазір заман басқа. Жаңа Қазақстан кезеңіне аяқ бастық. Осындай сындарлы сәтте Президенттің жанынан табылып, баршаға ортақ, ашық та жаңа дәуірді бірге құруымыз маңызды. Бұны Мемлекет басшысы нақты айты.
«Мемлекет басшысының тапсырмасын Ақпарат және қоғамдық даму министрлігі орындауға әзір әрі тиісті міндеттемелер күн тәртібіне енгізілді.
Ендеше ел ертеңі үшін бүгін біз жауаптымыз. Жаңа да Әділетті Қазақстанды құру жолында Жолдау жүктеген міндеттерді бірге жүзеге асырайық» деп қорытындылады министр.
