Сарысуда әкелі-балалы Есмахановтар «Алтын белгі» иегері атанды. Қалай десеңіз биыл Б.Адамбаев атындағы орта тірек мектебінің түлегі, Есмаханов Жаңалық Нұржанұлы үздік білімі үшін төсбелгі тағынса, әкесі 39 жыл бұрын «Алтын белгі» алған екен. Ауданға жанашыр азамат Нұржан Есмаханов та 1982 жылы осы мектепті тәмамдаған.
Нұржан Есмаханов ұлының зерек екенін айтады. «Бағыт-бағдар бергенім болмаса өзі оқыды», — дейді.
Есмаханов Жаңалық Нұржанұлы тек озат оқушы ғана емес, спорт саласында да жеткен жетістіктері бар, алдына нық қадам қоя білген жас талап иесі. Жетістіктеріне тоқталар болсақ: облыстық каратэ-до спорт жарыстарының чемпионы, республикалық алгебра пəнінен олимпиада да бірінші дəрежелі дипломмен марапатталған, республикалық «Ақ бота» интеллектуалдық марафонының үшінші орын иегері.
«Алтын белгі» иегерін Сарысу ауданының әкімі Марат Сұлтанғалиев құттықтап, марапаттады. Талапкердің ендігі мақсаты таңдаған мамандығы бойынша ЖОО-на түсіп, білікті маман иесі болу. Жалпы, Сарысуда 349 оқушы мектеп бітіріп, 22 оқушы «Алтын белгі» төсбелгісінің, 20 оқушы «Үздік аттестат» иегері атанды.
Дереккөз Жамбыл облысының өңірлік коммуникациялар қызметі
