Талас ауданы, Үшарал ауылының 68 жастағы тұрғыны дене қызуы 3 күннен бері түспей, тыныс алуы қиындаған соң, жедел жәрдем көлігімен орталық ауруханаға жеткізілген. Тексеру барысында компьютерліктомография өкпенің 50% зақымдалғанын анықтап, екі жақты полисегментарлы пневмония диагнозы қойылады. Сондай-ақ, пациентте көптеген ілеспе аурулары болған. Атап айтар болсақ, стенокардия, бүйректің басым зақымдануымен артериялық гипертензия, қан айналымының бұзылуы.
Науқас шұғыл түрде жансақтау бөліміне жатқызылып, оған қосымша респираторлық қолдау көрсетілген. Араға 5 күн салып, жағдайы жақсарған соң, арнайы ортақ бөлмеге ауыстырылған. Дәрігерлердің дер кезінде көрсетілген көмегінің арқасында ол 15 күн ішінде сырқатынан толық айығып шықты.
«Мен барлық медицина қызметкерлеріне алғыс айта отырып, біздің заманымыздың «нағыз батырларына» басымды ием. Облыс орталығына бармай-ақ, аудандық ауруханада қажетті ем-дом алып, отбасыма оралдым. Ақ халатты абзал жандарға бақыт, денсаулық және осы пандемиямен күресуде шыдамдылық тілеймін. Еңбектеріңіз жана берсін!» — дейді ол.
«Адамның аурудан жазылуы оның ішкі жағдайына, оның өмір сүруге, отбасына, жақындарына оралуға деген ниетіне тікелей байланысты. Бұл кісі біздің стационарымыздағы өмірге құштар науқастардың бірі болған, сондықтан да ол коронавирусты жеңді», — дейді емдеуші дәрігер Толқын Жаңабай.
Денсаулық сақтау басқармасының баспасөз қызметі
